കൊച്ചി: കേരള ബ്ലാസ്റ്റേഴ്‌സിന്റെ സൂപ്പര്‍ താരം സഹല്‍ അബ്ദുല്‍ സമദ് 2022വരെ ബ്ലാസ്റ്റേഴ്‌സില്‍ തുടരും. കഴിഞ്ഞ ദിവസമാണ് സഹല്‍ ബ്ലാസ്റ്റേഴ്‌സുമായി പുതിയ കരാറിലെത്തിയത്. മൂന്ന് വര്‍ഷത്തേക്കാണ് കരാര്‍. കഴിഞ്ഞ സീസണില്‍ ബ്ലാസ്റ്റേഴ്‌സിന്റെ മധ്യനിരയില്‍ മികച്ച പ്രകടനം നടത്തിയ സഹലിനെ എമര്‍ജിങ് പ്ലയറായി തിരഞ്ഞെടുത്തിരുന്നു.
ബ്ലാസ്റ്റേഴ്‌സിന്റെ സീസണ്‍ മോശമായിരുന്നെങ്കിലും സഹലിന്റെ നേട്ടം മാത്രമായിരുന്നു ബ്ലാസ്റ്റേഴ്‌സിന് എടുത്തു പറയാനുണ്ടായിരുന്നത്. ഐ.എസ്.എല്ലിലെ പ്രകടനം സഹലിനെ ഇന്ത്യന്‍ അ@ണ്ടര്‍ 23 ടീമില്‍ വരെ എത്തിച്ചിരുന്നു.
കേരള ബ്ലാസ്റ്റേഴ്‌സിനായി ഇതുവരെ 19 മത്സരങ്ങള്‍ കളിച്ച 22കാരന്‍ ഒരു ഗോളും സ്വന്തം പേരില്‍ കുറിച്ചിട്ടുണ്ട്. കേരളത്തിന് വേണ്ടി സന്തോഷ് ട്രോഫിയില്‍ കാഴ്ചവച്ച മികച്ച പ്രകടനമാണ് താരത്തിന് ബ്ലാസ്റ്റേഴ്‌സിലേക്കുള്ള വഴി തുറന്നത്.