പൂനെ: റിയോയിലെ ഇന്ത്യന്‍ മെഡല്‍ പ്രതീക്ഷയായ ഷൂട്ടിങ് താരം ചെയ്ന്‍ സിങിനെ ആശുപത്രിയില്‍ പ്രവേശിപ്പിച്ചു. ഒളിംപിക്‌സിനായി ലോസന്നെയില്‍ തയ്യാറെടുപ്പുകള്‍ നടത്തുന്നതിനിടെ  ഹൃദയ ധമനികളില്‍ രക്തം കട്ടപിടിച്ച് ശ്വാസ തടസ്സം നേരിട്ടതിനെ തുടര്‍ന്നാണ് ചെയ്ന്‍ സിങിനെ ആശുപത്രിയില്‍ പ്രവേശിപ്പിച്ചത്. താരത്തിനു ന്യൂമോണിയ ബാധിച്ചതായും സ്ഥിരീകരിച്ചിട്ടുണ്ട്.

 അസുഖം ഭേദമായി ചെയ്ന്‍ സിങ് നാലോ അഞ്ചോ ദിവസത്തിനുള്ളില്‍ പരിശീലനം പുനരാരംഭിക്കുമെന്നു കേണല്‍ ലളിത് ശര്‍മ വ്യക്തമാക്കി. സാരമുള്ള പ്രശ്‌നങ്ങളൊന്നും തന്നെയില്ലെന്നു ഡോക്ടര്‍മാര്‍ സ്ഥിരീകരിച്ചതായും ലളിത് ശര്‍മ പറഞ്ഞു.

റൈഫിള്‍ ഷൂട്ടറായ ചെയ്ന്‍, ഗഗന്‍ നരംഗ്, അപൂര്‍വി ചന്ദേല എന്നിവര്‍ക്കൊപ്പം ലോസന്നെയില്‍ സ്റ്റാനിസ്ലേവ് ലാപിഡെസിന്റെ പരിശീലനത്തിലാണ് റിയോയിലേക്ക് തയ്യാറെടുക്കുന്നത്. ഒളിംപിക്‌സില്‍ 50 മീറ്റര്‍ റൈഫിള്‍ പ്രോണ്‍, 50 മീറ്റര്‍ റൈഫിള്‍ ത്രീ പൊസിഷന്‍ വിഭാഗങ്ങളിലാണ് ചെയ്ന്‍ മത്സരിക്കുന്നത്.