കൊണ്ടോട്ടി: വിമാനത്താവളത്തില്‍നിന്ന് വീട്ടിലേക്ക് വീട്ടിലേക്ക് പോകുകയാരുന്ന ദമ്പതിമാരെ കാര്‍ തടഞ്ഞുവച്ച് ആക്രമിച്ച മൂന്ന് ടാക്‌സി ഡ്രൈവര്‍മാരെ കരിപ്പൂര്‍ പൊലിസ് അറസ്റ്റു ചെയ്തു. വള്ളിക്കുന്ന് സ്വദേശി മുഹമ്മദ് റാഫി (32), കോഡൂര്‍ സ്വദേശി എ.ഹാരിസ്(35), കടലുണ്ടി നഗരം സ്വദേശി വടക്കുകത്ത് നിസാര്‍ (32) എന്നിവരാണ് അറസ്റ്റിലായത്.
കണ്ണൂര്‍ കൊട്ടിയൂര്‍ സ്വദേശി സനോജ് നല്‍കിയ പരാതിയിലാണ് മൂവരെയും പൊലിസ് പിടികൂടിയത്. ചൊവ്വാഴ്ച രാത്രി 11ഓടെ ഭാര്യാ പിതാവിനെയും മാതാവിനെയും വിദേശത്തേക്ക് യാത്രയാക്കാനാണ് സനോജും ഭാര്യയും കരിപ്പൂരിലെത്തിയത്. മടങ്ങുന്നതിനിടെ വിമാനത്താവളത്തിന് മുന്നില്‍ മൂന്ന് പ്രതികളുമെത്തി, ഇവര്‍ സഞ്ചരിക്കുന്ന വാഹനം കള്ള ടാക്‌സിയാണെന്ന് പറഞ്ഞ് തടയുകയായിരുന്നു. പൊലിസ് ഇടപെട്ട് വിട്ടയച്ചെങ്കിലും പിന്നീട് കൊളത്തൂര്‍ ജങ്ഷനില്‍ കാര്‍ പിന്തുടര്‍ന്നെത്തി തടയുകയും ഭാര്യയെ മര്‍ദിക്കുകയും ഭീഷണിപ്പെടുത്തുകയും ചെയ്തതായി പരാതില്‍ പറയുന്നു.
കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു കോഴിക്കോട് സബ്ജയിലേക്ക് മാറ്റി.പ്രതികള്‍ വിമാനത്താവളത്തിലെ പ്രീപെയ്ഡ് ടാക്‌സി ഡ്രൈവര്‍മാരല്ലെന്ന് കരിപ്പൂര്‍ പൊലിസ് പറഞ്ഞു.