ജിദ്ദ: സോഷ്യല്‍മീഡിയവഴിയുള്ള ആക്ഷേപഹാസ്യങ്ങള്‍ക്കു വിലക്കേര്‍പ്പെടുത്തി സഊദി ഭരണകൂടം. സമൂഹികമാധ്യമങ്ങള്‍വഴി പ്രചരിക്കുന്ന ആക്ഷേപഹാസ്യങ്ങള്‍ പൊതുസമാധാനത്തിനു ഭീഷണി ഉയര്‍ത്തുന്നതു മുന്‍നിര്‍ത്തിയാണ് വിലക്ക്. ഇതു പാലിക്കാത്തവര്‍ക്ക് അഞ്ചു വര്‍ഷംവരെ തടവും മൂന്നു മില്യന്‍ റിയാല്‍വരെ പിഴയും ചുമത്തും. ഓണ്‍ലൈന്‍ കുറ്റകൃത്യങ്ങളെക്കുറിച്ചു പൊതുജനങ്ങള്‍ക്കും റിപ്പോര്‍ട്ട് ചെയ്യാമെന്നു പബ്ലിക് പ്രോസിക്യൂട്ടര്‍ അറിയിച്ചു. പൊതുജനങ്ങള്‍ക്കു പ്രയാസകരമാകുന്ന എല്ലാവിധ ഓണ്‍ലൈന്‍ ഇടപെടലുകള്‍ക്കും കടുത്ത ശിക്ഷയുണ്ടാകും. പരിഹാസ്യമായതും പ്രകോപനപരമായതും ശല്യപ്പെടുത്തുന്നതുമായ പോസ്റ്റുകള്‍ക്കും ശിക്ഷയുണ്ടാകും. അത്തരം പോസ്റ്റുകള്‍ ഫോര്‍വേഡ് ചെയ്യുന്നതിനും മറ്റുള്ളവര്‍ക്ക് അയച്ചുകൊടുക്കുന്നതിനും അനുവാദമില്ല. മതമൂല്യങ്ങളെ ഇകഴ്ത്തുന്നതും പൊതുധാര്‍മികതയ്ക്കു നിരക്കാത്തതും തെറ്റിദ്ധരിപ്പിക്കുന്നതുമായ ഉള്ളടക്കങ്ങളുള്ളവയും ഈ ഗണത്തില്‍ ഉള്‍പ്പെടും.