ജിദ്ദ: സഊദിയില്‍ എന്‍ജിനീയറിങ് മേഖലയുമായി ബന്ധപ്പെട്ട് 30 സാങ്കേതിക തൊഴിലുകള്‍ നിര്‍വഹിക്കുന്ന പ്രവാസികള്‍ക്ക് ഇനി ഇഖാമ പുതുക്കാന്‍ അംഗീകൃത സര്‍ട്ടിഫിക്കറ്റു നിര്‍ബന്ധമാക്കുന്നു. ഇതു സംബന്ധിച്ചുള്ള നടപടിക്രമങ്ങള്‍ ജവാസാത്ത് ഡയറക്ടറേറ്റുമായി ബന്ധിപ്പിച്ചതായി സഊദി കൗണ്‍സില്‍ ഓഫ് എന്‍ജിനീയേഴ്സ് വിഭാഗം അറിയിച്ചു. ഈ തൊഴിലാളികളെ ആഭ്യന്തര മന്ത്രാലയത്തിനു കീഴിലെ നാഷണല്‍ ഇന്‍ഫര്‍മേഷന്‍ സെന്ററുമായും ബന്ധിപ്പിച്ചിട്ടുണ്ട്. എന്‍ജിനീയര്‍മാരും സാങ്കേതിക ജോലിക്കാരും അടക്കമുള്ള മുഴുവന്‍ അംഗങ്ങള്‍ക്കും സേവനങ്ങള്‍ എളുപ്പമാക്കാന്‍ ശ്രമിച്ചാണ് ബന്ധപ്പെട്ട വകുപ്പുകളെയും സഊദി കൗണ്‍സില്‍ ഓഫ് എന്‍ജിനീയേഴ്സിനെയും ബന്ധിപ്പിച്ചിരിക്കുന്നത്. എന്‍ജിനീയറിങ് പ്രൊഫഷന്‍ പ്രാക്ടീസ് നിയമവും നിയമാവലിയും നടപ്പാക്കുന്നതിനും ഇതുവഴി എന്‍ജിനീയറിങ് മേഖലയുടെ വികസനത്തിനും വ്യാജന്മാരില്‍ നിന്നും ഈ മേഖലക്ക് സംരക്ഷണം നല്‍കുന്നതിനും ഇതു വഴി സാധിക്കുമെന്ന് സഊദി കൗണ്‍സില്‍ ഓഫ് എന്‍ജിനീയേഴ്സ് അറിയിച്ചു.
ഇലക്ട്രിക്കല്‍ ഡ്രാഫ്റ്റ്സ്മാന്‍, മെക്കാനിക്കല്‍ ഡ്രാഫ്റ്റ്സ്മാന്‍, ഇലക്ട്രിക്കല്‍ ഡിസൈന്‍ ഡ്രാഫ്റ്റ്സ്മാന്‍, പവര്‍പ്രാന്റ് ഇന്‍സ്റ്റലേഷന്‍
ടെക്നീഷ്യന്‍, പവര്‍സ്റ്റേഷന്‍ ഓപ്പറേഷന്‍സ്- മെയിന്റനന്‍സ് ടെക്നീഷ്യന്‍, സബ്സ്റ്റേഷന്‍ ട്രാന്‍സ്ഫോര്‍മര്‍ സ്റ്റേഷന്‍) ഇന്‍സ്റ്റലേഷന്‍ ടെക്നീഷ്യന്‍, ഇലക്ട്രിക്കല്‍ ലൈന്‍- ടെക്നീഷ്യന്‍, ഇലക്ട്രിക്കല്‍ ഗ്രൗണ്ട് കേബിള്‍ ടെക്നീഷ്യന്‍, കസ്റ്റമര്‍ സര്‍വിസ് ഇലക്ട്രിക്കല്‍ ടെക്നീഷ്യന്‍, ഇലക്ട്രിക്കല്‍ എക്സ്റ്റേന്‍ഷന്‍ ടെക്നീഷ്യന്‍ തുടങ്ങിയ 30 പ്രൊഫഷനുകള്‍ പുതുക്കുന്നതിനു വേണ്ടിയാണ് സര്‍ട്ടിഫിക്കറ്റ് നിര്‍ബന്ധമാക്കുന്നത്.
അതേ സമയം പ്രഫഷന്‍ മാറ്റം എളുപ്പമായ സമയത്ത് നിരവധി പ്രവാസികള്‍ വിസിറ്റിംങ് വിസയും മറ്റും വേഗത്തില്‍ ലഭിക്കാനും പെട്ടെന്ന് സഊദിവത്ക്കരണം വരില്ലെന്ന ധാരണയിലും നിരവധി ഫന്നി പ്രൊഫഷനുകളിലേക്കായിരുന്നു ഇഖാമ മാറ്റിയത്. ഭൂരിപക്ഷം പേരും സര്‍ട്ടിഫിക്കറ്റുകള്‍ ഇല്ലാതെയായിരുന്നു മാറിയത് എന്നതിനാല്‍ പുതിയ നിയമം ഇത്തരക്കാര്‍ക്ക് വലിയ തലവേദനയാവും.