കോഴിക്കോട്: നാരായണഗുരുവിന്റെ പേരില്‍ സംസ്ഥാനത്തിന്റെ ആദ്യ ഓപ്പണ്‍ സര്‍വകലാശാല ഇന്ന് ഉദ്ഘാടനം ചെയ്യപ്പെടുമ്പോള്‍ ആശങ്കകള്‍ ഇനിയും ബാക്കി. ന്യൂനപക്ഷങ്ങള്‍ ഉള്‍പ്പെടെ പതിനായിരക്കണക്കിന് വിദ്യാര്‍ഥികളുടെ ഉന്നത പഠനമേഖലയില്‍ സംശയങ്ങള്‍ അവശേഷിപ്പിച്ചാണ് മലബാറിനെ അവഗണിച്ച് സര്‍വകലാശാലയ്ക്ക് സര്‍ക്കാര്‍ കൊല്ലത്ത് തുടക്കമിടുന്നത്.
റഗുലര്‍ വിദ്യാഭ്യാസത്തിന് സര്‍ക്കാര്‍ സംവിധാനമൊരുക്കാത്തതിന്റെ പേരില്‍ രണ്ടാം തരം പൗരന്‍മാരായി മാറ്റി നിര്‍ത്തപ്പെടുകയും സര്‍വകലാശാലകളുടെ വിദൂര വിഭാഗത്തില്‍ പഠിക്കുകയും ചെയ്യുന്ന പതിനായിരങ്ങളാണ് കേരളത്തിലുള്ളത്.
ജോലിയോടൊപ്പം പഠനമാഗ്രഹിക്കുന്നവരും റഗുലറിന് സമാന്തരമായി കോഴ്‌സ് ചെയ്യുന്നവരും റഗുലര്‍ പഠനത്തിന് താല്‍പര്യമില്ലെങ്കിലും തങ്ങളുടെ വിദ്യാഭ്യാസ യോഗ്യതകള്‍ മെച്ചപ്പെടുത്താനാഗ്രഹിക്കുന്നവരുമാണ് വിദൂര വിദ്യാഭ്യാസ മേഖലയില്‍ സാധാരണഗതിയില്‍ ഉപരിപഠനം നടത്തി വരാറുള്ളത്. റഗുലര്‍ വിദ്യാര്‍ഥികളെപ്പോലെ കഴിവും പ്രാപ്തിയും ഉള്ളവരും എന്നാല്‍ സാഹചര്യങ്ങള്‍ മൂലം കോളജ് പഠനത്തിന് പോകാന്‍ കഴിയാത്തവരുമുള്‍പ്പെടെയുള്ള ഇത്തരക്കാര്‍ അധ്വാനിച്ച് പഠിച്ചാല്‍ തന്നെ സര്‍വകലാശാലകള്‍ നല്‍കുന്ന സര്‍ട്ടിഫിക്കറ്റുകളുടെ മൂല്യം രണ്ടാം കിടയായിട്ടാണ് പരിഗണിക്കാറ്. ജോലി നേടുന്നതുള്‍പ്പെടെയുള്ള കാര്യങ്ങള്‍ക്ക് വിദൂര പഠനത്തിന് റഗുലറിന്റെ തുല്യത പറയുന്നുണ്ടെങ്കിലും പ്രയോഗത്തിലുണ്ടാവാറില്ല.കേരളത്തിലെ വിദൂര വിദ്യാഭ്യാസ കോഴ്‌സുകളും സര്‍ട്ടിഫിക്കറ്റുകളും കേരളത്തിലും പുറത്തുള്ളതുമായ എല്ലാ യൂനിവേഴ്‌സിറ്റികളും ഉന്നത വിദ്യാഭ്യാസ സ്ഥാപനങ്ങളും അംഗീകരിക്കുന്നില്ലെന്ന യാഥാര്‍ഥ്യം ഇപ്പോഴും നിലനില്‍ക്കയാണ്.
നിലവില്‍ സര്‍വകലാശാലകളിലെ വിദൂര വിദ്യാഭ്യാസ വിഭാഗം അടച്ചു പൂട്ടുകയും എല്ലാം ഓപ്പണ്‍ സര്‍വകലാശാലയ്ക്കു കീഴില്‍ വരികയും ചെയ്യുമ്പോള്‍ കേരളത്തില്‍ നിന്നും ഗള്‍ഫ് നാടുകള്‍ ഉള്‍പ്പെടെയുള്ള സ്ഥലങ്ങളിലേക്ക് ജോലി തേടിപ്പോകുന്നവര്‍ റഗുലര്‍, വിദൂര വിഭജനത്തിന്റെ പേരില്‍ ഏറെ പ്രയാസങ്ങള്‍ അനുഭവപ്പെടുന്നുണ്ട്.
കേരളത്തില്‍ വിവിധ മതവിദ്യാഭ്യാസ സ്ഥാപനങ്ങളില്‍ ഉള്‍പ്പെടെ പഠിക്കുന്ന പതിനായിരക്കണക്കിന് വിദ്യാര്‍ഥികള്‍ തങ്ങളുടെ ആത്മീയ പഠനത്തോടൊപ്പം ഭൗതിക വിദ്യാഭ്യാസം നേടുന്നുണ്ട്. ഇതിനായി പലരും സര്‍വകലാശാലകളുടെ വിദൂര വിദ്യാഭ്യാസ വകുപ്പിനെയാണ് ആശ്രയിക്കുന്നത്.
റഗുലര്‍ വിദ്യാലയങ്ങളില്‍ പഠിക്കാന്‍ വേണ്ട എല്ലാ യോഗ്യതകളും ഉള്ള നിരവധി പേരാണ് ഇത്തരത്തില്‍ പഠനം തുടരുന്നത്. വിദൂരവിദ്യാസ വിഭാഗം നിര്‍ത്തലാവുന്നതോടെ ഓപ്പണ്‍ സര്‍വകലാശാലയ്ക്കു കീഴിലേക്ക് ഇവര്‍ മാറേണ്ടിവരും. ഇതുമായി ബന്ധപ്പെട്ട സാങ്കേതിക പ്രശ്‌നങ്ങളും രജിസ്‌ട്രേഷന്‍ സംബന്ധമായ കാര്യങ്ങളുമെല്ലാം എന്തൊക്കെയാണെന്ന ആശങ്കയും വിദ്യാര്‍ഥികളില്‍ നിലനില്‍ക്കയാണ്.
കേരളത്തില്‍ വടക്കന്‍ ജില്ലകള്‍ ഉള്‍ക്കൊള്ളുന്ന മലബാര്‍ മേഖലയില്‍ ഉന്നത വിദ്യാഭ്യാസ രംഗത്തെ അപര്യാപ്തതകള്‍ ശോചനീയമായി തുടരുന്ന അവസ്ഥയാണുള്ളത്. ഇത്തരമൊരവസ്ഥയില്‍ കേരളത്തിന് ഒരു ഓപ്പണ്‍ സര്‍വകലാശാല സ്ഥാപിക്കാന്‍ ഏറ്റവും കൂടുതല്‍ സാധ്യതയുള്ളത് മലബാര്‍ മേഖലയിലായിരുന്നുവെന്ന് ചൂണ്ടിക്കാണിക്കപ്പെട്ടിരുന്നു.
വിവിധ വിദ്യാര്‍ഥി സംഘടനകളും വിദ്യാഭ്യാസ രംഗത്തുള്ളവരും ആവശ്യപ്പെട്ടിട്ടും ഓപ്പണ്‍ സര്‍വകലാശാലയുടെ ആസ്ഥാനം മലബാറിന് നല്‍കാതിരുന്നത് കടുത്ത പ്രതിഷേധം ഉളവാക്കിയിട്ടുണ്ട്. ആസ്ഥാനം മലബാര്‍ മേഖലയില്‍ തന്നെയായിരിക്കുമെന്ന് ഉന്നത വിദ്യാഭ്യാസ വകുപ്പ് മന്ത്രി കെ. ടി ജലീലിന്റെ വാക്കുകളും ഇപ്പോള്‍ വൃഥാവിലായിരിക്കയാണ്. സര്‍വകലാശാലകളുടെ വിദൂര വിദ്യാഭ്യാസ കേന്ദ്രങ്ങള്‍ അടച്ചുപൂട്ടുന്നതിലൂടെ ഇതര സംസ്ഥാന വിദ്യാഭ്യാസ ലോബികളുടെ താല്‍പര്യത്തിനനുസരിച്ച് മലയാളി വിദ്യാര്‍ഥികളെ അവരുടെ സ്ഥാപനങ്ങളിലേക്ക് റിക്രൂട്ട് ചെയ്യുന്നതിനു സഹായകമാവുമെന്ന ആക്ഷേപം ഉയര്‍ന്നിരുന്നു. കൊല്ലത്തെ കുരീപ്പുഴയില്‍ ആരംഭിക്കുന്ന ഓപ്പണ്‍സര്‍വകലാശാല മറ്റൊരു ഈജിയന്‍ തൊഴുത്തായി മാറുമോ എന്ന ആശങ്കയാണ് പലരും പങ്കുവെക്കുന്നത്.