തച്ചനാട്ടുകര: ദേശീയപാത 213 ലെ കരിങ്കല്ലത്താണി ഇറക്കത്തില്‍ അപകടം കൂടുന്നു. കുത്തനെയുള്ള ഇറക്കത്തിനു താഴെ തൊടൂകാപ്പ് ഇറക്കത്തില്‍ അപകടത്തില്‍ പെട്ട ലോറിയാണ് അപകട ഭീഷണി ഉയര്‍ത്തുന്നത്.  പാലക്കാട് ഭാഗത്ത് നിന്ന്‌കോഴിക്കോട്  ഭാഗത്തേക്ക്  പോവുകയായിരുന്ന കണ്ടെയ്‌നര്‍ ലോറി തൊടൂകാപ്പിലെ കള്ള്ഷാപ്പിനു സമീപത്തെ കയറ്റത്തില്‍ അപകടത്തില്‍ പെടുകയായിരുന്നു.
ഗിയര്‍ബോക്‌സ് തകരാറില്‍ ആയതിനെ തുടര്‍ന്ന് നിയന്ത്രണംവിട്ട് പുറക്കോട്ട് വന്ന് വിലങ്ങനെ നില്‍ക്കുകയാണ്  കണ്ടെയ്‌നര്‍ ലോറി. നീളമേറിയ ലോറിയുടെ മുന്‍ ഭാഗം പ്രധാന റോഡില്‍ തന്നെയാണ് നില്‍ക്കുന്നത്.
റോഡില്‍ നിന്ന് സൈഡിലേക്കിറങ്ങിയ സമയത്ത് പുറകില്‍ വാഹനം വരാതിരുന്നതിനാല്‍ വന്‍ ദുരന്തം ഒഴിവായി. ഇറക്കത്തില്‍ നിന്നും വരുന്ന വാഹനങ്ങള്‍ അപകടത്തില്‍ പെടാനുള്ള സാധ്യത ഏറെ കൂടുതലാണ്.