എടക്കര: മലയോര മേഖലയിലെ അനാഥ സംരക്ഷകനായിരുന്ന കളത്തിങ്ങല്‍ ഹംസഹാജിക്കു ജന്‍മനാട് വിടനല്‍കി. എടക്കര യതീംഖാന സ്ഥാപിച്ച ഹംസഹാജി, ഒരേസമയം മതപരമായും രാഷ്ട്രീയപരമായും സാമൂഹ്യമേഖലകളില്‍ നിറസാന്നിധ്യമായിരുന്നു.
ഹംസഹാജിയുടെ ഏഴാം വയസിലാണ് പിതാവ് കളത്തിങ്ങല്‍ അഹമ്മദ്  മരിച്ചത്. ചെറുപ്പത്തിലെ അനാഥത്വത്തിന്റെ ഒറ്റപ്പെടലും വേദനയും അനുഭവിച്ചറിഞ്ഞു. അനാഥമക്കളുടെ നോവറിഞ്ഞ അദ്ദേഹം  എടക്കരയില്‍ അനാഥാലയം സ്ഥാപിച്ചു. യതീം ഖാനയുടെ വളര്‍ച്ചയില്‍ എല്‍.പി, യു.പി, ഹയര്‍സെക്കന്‍ഡറി സ്‌കൂളുകളും സ്ഥാപിതമായി. 1955 മുതലാണ് ലീഗില്‍ സജീവമാകുന്നത്. 1959 ലെ വിമോചന സമരകാലത്ത് ജയിലില്‍ കിടന്നു. പോക്കര്‍ സാഹിബ്, ഇസ്മാഈല്‍ സാഹിബ്, സി.എച്ച് മുഹമ്മദ് കോയ, സേട്ടുസാഹിബ് എന്നിവരോടാപ്പം പ്രവര്‍ത്തിച്ചു.
പാലത്തിങ്ങല്‍ പള്ളിയുടെ സ്ഥാപക പ്രസിഡന്റായിരുന്നു. 963ല്‍ എടക്കര പഞ്ചായത്ത് തെരെഞ്ഞെടുപ്പില്‍ മത്സരിച്ചു ജയിച്ചു. പിന്നീട് പഞ്ചായത്തിന്റെ വൈസ് പ്രസിഡന്റായി. വഴിക്കടവ് പഞ്ചായത്ത് രൂപീകരിച്ചപ്പോള്‍ അതിന്റെ പ്രഥമ പ്രസിഡന്റായി. വിവിധ കാലയളവുകളിലായി ഇരുപതു വര്‍ഷം പ്രസിഡന്റായി.
വണ്ടൂര്‍ ബ്ലോക്ക് ചെയര്‍മാന്‍, കോഴിക്കോട്, മലപ്പുറം ഡി.ഡി.സി, ഏറനാട് താലൂക്ക് ലാന്റ് ബോര്‍ഡ് മെമ്പര്‍, എടക്കര മുസ്‌ലിം ഓര്‍ഫനേജ് കമ്മിറ്റി ജനറല്‍ സെക്രട്ടറി, സംസ്ഥാന ഓര്‍ഫനേജസ് കോഡിനേഷന്‍ കമ്മിറ്റി ജില്ലാ ജനറല്‍ സെക്രട്ടറി, കേരള മുസ്‌ലിം ഓര്‍ഫനേജ് കമ്മിറ്റി ജില്ലാ പ്രസിഡന്റ്, ഐ.എന്‍.എല്‍ മുന്‍ സംസ്ഥാന സമിതിയംഗം, ചുങ്കത്തറ, എടക്കര ഗ്രാമപഞ്ചായത്തംഗം, നാരോക്കാവ്  ഹയര്‍ സെക്കന്‍ഡറി സ്‌കൂള്‍, പാലാട് ഇ.എം.ഒ ഗേള്‍സ് റസിഡന്‍ഷ്യല്‍ ഇംഗ്ലീഷ് മീഡിയം സ്‌കൂള്‍, മുണ്ട ഇ.എ.ഒ യു.പി സ്‌കൂള്‍, എല്‍.പി സ്‌കൂള്‍ എന്നിവയുടെ മാനേജര്‍, പാലത്തിങ്ങല്‍ ജുമാമസ്ജിദ് സ്ഥാപക ജനറല്‍ സെക്രട്ടറി തുടങ്ങി നിരവധി പദവികള്‍ വഹിച്ചു.
വിവിധ ഭാഗങ്ങളില്‍നിന്ന് ആയിരങ്ങള്‍ അന്തിമോപചാരമര്‍പ്പിക്കാനെത്തി. പാണക്കാട് സയ്യിദ് സ്വാദിഖലി ശിഹാബ് തങ്ങള്‍, മുസ്‌ലിംലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ്, പി.വി അബ്ദുല്‍ വഹാബ് എം.പി, അഡ്വ. യു.എ ലത്തീഫ്, എം.എല്‍.എമാരായ പി.കെ ബഷീര്‍, അഡ്വ. എം. ഉമ്മര്‍, പി. അബ്ദുല്‍ ഹമീദ്, പി.വി അന്‍വര്‍, മുന്‍ മന്ത്രിമാരായ ആര്യാടന്‍ മുഹമ്മദ്, നാലകത്ത് സൂപ്പി, മുന്‍ എം.എല്‍.എ കെ.മമ്മുണ്ണിഹാജി, കൊളത്തൂര്‍ ടി. മുഹമ്മദ് മൗലവി,  വണ്ടൂര്‍ ഹൈദരലി, പി.വി മുഹമ്മദ് അരീക്കോട്, എം.സി മുഹമ്മദ് ഹാജി, മൊയ്തീന്‍ ഫൈസി പുത്തനഴി, ഇസ്ഹാഖ് ഫൈസി ചാമപ്പറമ്പ്, അബ്ദുല്‍ ഹമീദ് ഫൈസി അമ്പലക്കടവ്, റഹ്മത്തുള്ളാ ഖാസിമി മൂത്തേടം, അസീസ് മുസ്‌ലിയാര്‍, എ.പി യഅ്കൂബ് ഫൈസി, സലീം എടക്കര, ജില്ലാ പഞ്ചായത്ത് അംഗങ്ങളായ ഇസ്മാഈല്‍ മൂത്തേടം, സറീനാ മുഹമ്മദാലി, ഒ.ടി ജയിംസ്, ഷെര്‍ളി വര്‍ഗീസ്, ബ്ലോക്ക് പഞ്ചായത്ത് പ്രസിഡന്റുമാരായ പി. ഖാലിദ് മാസ്റ്റര്‍, പി. സുഗതന്‍ മാസ്റ്റര്‍, ബ്ലോക്ക് പഞ്ചായത്ത് അംഗം കെ.ടി കുഞ്ഞാന്‍, പഞ്ചായത്ത് പ്രസിഡന്റുമാര്‍, പഞ്ചായത്ത് അംഗങ്ങള്‍ എന്നിവര്‍ എത്തിയിരുന്നു. ഉച്ചയ്ക്കു മൂന്നരയോടെ പാലത്തിങ്ങല്‍ ജുമാമസ്ജിദ് ഖബര്‍സ്ഥാനില്‍ വന്‍ജനാവലിയുടെ സാന്നിധ്യത്തില്‍ ഖബറടക്കി. ശേഷം മുണ്ട അങ്ങാടിയില്‍ അനുസ്മരണ യോഗവും ചേര്‍ന്നു.എം.കെ സമദ് അധ്യക്ഷനായി. പഞ്ചായത്ത് പ്രസിഡന്റ് ഇ.എ സുകു, വി.വി പ്രകാശ്, ഒ.ടി ജയിംസ്, ഇസ്മാഈല്‍ മൂത്തേടം, കെ.ടി കുഞ്ഞാന്‍, പി.എച്ച് ഇബ്രാഹീം, കാരാടന്‍ സുലൈമാന്‍, സി.എച്ച് ഇഖ്ബാല്‍, ടി.സി നാഗന്‍, എ.അബ്ദുള്ള, തേറമ്പത്ത് അബ്ദുല്‍ കരീം, പി.എം അക്ബറലി, പി.കെ അബ്ദുല്‍ കരീം, മത്തായിക്കുട്ടി മാസ്റ്റര്‍, ഗോപന്‍ മരുത സംസാരിച്ചു.