ചെര്‍ക്കള: മണ്ണാര്‍ക്കാട് മണ്ഡഡലത്തിലെ വിജയം കാന്തപുരത്തിന്റെ കേരള ഇമാമാകാനുള്ള ശ്രമത്തിനേറ്റ തിരിച്ചടിയാണെന്നു മണ്ണാര്‍ക്കാട് എം.എല്‍.എ എന്‍ ശംസുദ്ദീന്‍ പറഞ്ഞു. നായന്മാര്‍മൂല ടൗണ്‍ മുസ്‌ലിം ലീഗ് കമ്മിറ്റി നല്‍കിയ സ്വീകരണ യോഗത്തില്‍ സംസാരിക്കുകയായിരുന്നു അദ്ദേഹം. മണ്ണാര്‍ക്കാടിന്റെ ചരിത്രം പരിശോധിച്ചാല്‍ ഓരോ മുന്നണികളും മാറി മാറി വിജയിക്കുകയാണു പതിവ്. കഴിഞ്ഞ തവണ യു.ഡി.എഫ് വിജയിച്ചതു കൊണ്ട് ഇത്തവണ എല്‍.ഡി.എഫ് വിജയിക്കുമെന്ന് കണക്കു കൂട്ടിയ കാന്തപുരം മുസ്‌ലിം ലീഗിനെ പരാജയപ്പെടുത്താന്‍ ആഹ്വാനം ചെയ്തു. എന്നാല്‍, എല്‍. ഡി.എഫ് വിജയിച്ചാല്‍ കേരള ഇമാമാകനുളള ശ്രമത്തെയാണ് മണ്ണാര്‍ക്കാട് മണ്ഡലത്തിലെ മതേതര വിശ്വാസികള്‍ പരാജയപ്പെടുത്തിയത്.
എല്ലാ തെരഞ്ഞെടുപ്പുകളിലും ഞങ്ങള്‍ പിന്തുണച്ചവര്‍ വിജയിച്ചു എന്നവകാശപ്പെടുന്ന കാന്തപുരം വിഭാഗത്തെ കഴിഞ്ഞ തെരഞ്ഞെടുപ്പോടെ കേരളത്തിലെ ജനങ്ങള്‍ മനസ്സിലാക്കി കഴിഞ്ഞുവെന്നും ശംസുദ്ദീന്‍ പറഞ്ഞു.
മുസ്‌ലിം ലീഗ് ജില്ലാ പ്രസിഡന്റ് ചെര്‍ക്കളം അബ്ദുല്ല ഉദ്ഘാടനം ചെയ്തു. സിദ്ധീഖലി രങ്ങാട്ടൂര്‍, എന്‍.എ നെല്ലിക്കുന്ന് എം.എല്‍.എ, പി.ബി അബ്ദുറസാഖ് എം.എല്‍. എ, സി.ടി അഹമ്മദലി, ബഷീര്‍ വെളളിക്കോത്ത് എന്‍.എ അബൂബക്കര്‍, ഖാദര്‍ പാലോത്ത് തുടങ്ങിയവര്‍ സംസരിച്ചു.