മണ്ണുത്തി: ഹരിത വിപ്ലവത്തിന്റെ നേട്ടങ്ങളും കോട്ടങ്ങളും ശാസ്ത്രീയമായി വിലയിരുത്തേണ്ടത് അനിവാര്യമാണെന്ന് കൃഷി മന്ത്രി വി.എസ് സുനില്‍ കുമാര്‍ അഭിപ്രായപ്പെട്ടു. വെള്ളാനിക്കര ഹോര്‍ട്ടിക്കള്‍ച്ചര്‍ കോളജില്‍ കാര്‍ഷിക സര്‍വകലാശാല സംഘടിപ്പിച്ച ഡോ.കെ.എന്‍ ശ്യാമസുന്ദരന്‍ നായര്‍ അനുസ്മരണച്ചടങ്ങില്‍ സംസാരിക്കുകയായിരുന്നു മന്ത്രി.
 രാജ്യത്തിന്റെ ഏറ്റവും വലിയ സ്വത്ത് ജൈവ സമ്പത്താണ്. നമ്മുടെ ജൈവ സമ്പത്തിനും മണ്ണിനും വായുവിനുമൊക്കെ ഹരിതവിപ്ലവം ശോഷണം വരുത്തിയെന്ന വാദം പരിശോധിക്കപ്പെടണം. ജൈവകൃഷിയെ അനുകൂലിക്കുമ്പോള്‍ തന്നെ അതൊരു തീവ്രവാദമായി മാറാന്‍ അനുവദിക്കാനാവില്ല, മന്ത്രി പറഞ്ഞു. ആഗോളവല്‍ക്കരണത്തിന്റെ ആദ്യ ഘട്ടങ്ങളില്‍ തന്നെ അതുണ്ടാക്കുന്ന വെല്ലുവിളികളെ കുറിച്ച് ബോധവല്‍കരണം നടത്തിയ ആളായിരുന്നു ഡോ.കെ.എന്‍ ശ്യാമസുന്ദരന്‍ നായരെന്ന് മന്ത്രി പറഞ്ഞു. ആസൂത്രണ ബോര്‍ഡംഗമായും വൈസ് ചാന്‍സലറായും ഇരിക്കുമ്പോഴും മനുഷ്യത്വവും ജനാധിപത്യ ബോധവും ലാളിത്യവും കൈവിടാതെ പെരുമാറിയ അദ്ദേഹം ഒരു മാതൃകാ പൊതുപ്രവര്‍ത്തകനുമായിരുന്നു.
മാറ്റങ്ങള്‍ക്കു വേണ്ടിയുള്ള പ്രവര്‍ത്തനങ്ങള്‍ മണ്ണില്‍ ചവിട്ടി വേണം നടത്താനെന്ന് അദ്ദേഹത്തിന്റെ സ്മരണ നമ്മെ ഓര്‍മിപ്പിക്കുന്നുവെന്ന് അദ്ദേഹം കൂട്ടി ചേര്‍ത്തു. ജനിതക വിപ്ലവത്തിന്റെ നൈതികതയും സാമൂഹ്യപ്രത്യാഘാതങ്ങളും എന്ന വിഷയത്തില്‍ കേരള സര്‍വകലാശാലാ മുന്‍ വൈസ് ചാന്‍സലര്‍ ഡോ.ബി.ഇക്ബാല്‍ അനുസ്മരണ പ്രഭാഷണം നടത്തി. കെ.രാജന്‍ എം.എല്‍.എ അധ്യക്ഷനായി. വൈസ് ചാന്‍സലര്‍ ഡോ.പി രാജേന്ദ്രന്‍, വിജ്ഞാന്‍ വ്യാപന ഡയറക്ടര്‍ ഡോ.എസ്.എസ്റ്റലിറ്റ, ഗവേഷണ ഡയറക്ടര്‍ ഡോ.സാജന്‍ കുര്യന്‍, രജിസ്ട്രാര്‍ ഡോ.കെ.അരവിന്ദാക്ഷന്‍, സ്ത്രീപഠനകേന്ദ്രം മേധാവി ഡോ.പി.എസ് ഗീതകുട്ടി സംസാരിച്ചു.