കൊല്ലം: എന്‍.ആര്‍.ഇ.ജി വര്‍ക്കേഴ്‌സ് യൂനിയന്‍ നേതൃത്വത്തില്‍ ജില്ലയില്‍ തൊഴിലുറപ്പുതൊഴിലാളികള്‍ പ്രക്ഷോഭം നടത്തുമെന്ന് പ്രസിഡന്റ് സൂസന്‍ കോടി,സെക്രട്ടറി വി ജയപ്രകാശ്, ഡി രാധാകൃഷ്ണന്‍ എന്നിവര്‍ വാര്‍ത്താസമ്മേളനത്തില്‍ അറിയിച്ചു.
കൂലി കുടിശ്ശിക വിതരണം ചെയ്യുക, ലേബര്‍ ബജറ്റ് വര്‍ദ്ധിപ്പിച്ച് നല്‍കുക, കൂലി 500 രൂപയാക്കി ഉയര്‍ത്തുക, ജോലിസമയം രാവിലെ 9 മുതല്‍ വൈകിട്ട് നാലുവരെയാക്കുക തുടങ്ങിയ ആവശ്യങ്ങള്‍ ഉന്നയിച്ചാണ് 9,11 തീയതികളില്‍ ഉപരോധം സംഘടിപ്പിച്ചിട്ടുള്ളത്. 9ന് രാവിലെ കൊല്ലം ചിന്നക്കട ഹെഡ്‌പോസ്‌റ്റോഫിസ് മുന്‍പില്‍ സി.പി.എം ജില്ലാ സെക്രട്ടറി കെ.എന്‍ ബാലഗോപാലും 11ന് രാവിലെ കൊട്ടാരക്കര ഹെഡ്‌പോസ്‌റ്റോഫിസ് മുന്നില്‍ സൂസന്‍ കോടിയും ഉപരോധം ഉദ്ഘാടനം ചെയ്യും.