'ചൈനയ്ക്ക് ഇന്ത്യയുടെ ഭൂമി വിട്ടുകൊടുത്തു; കോണ്‍ഗ്രസായിരുന്നു ഭരണത്തിലെങ്കില്‍ ചൈനയെ നേരിടാന്‍ 15 മിനുട്ട് മതിയാകുമായിരുന്നു'
ചണ്ഡിഗഢ്: വിവിധ വിഷയങ്ങളില്‍ പ്രധാനമന്ത്രി നരേന്ദ്രമോദിക്കും കേന്ദ്രസര്‍ക്കാരിനുമെതിരേ രൂക്ഷ വിമര്‍ശനവുമായി രാഹുല്‍ ഗാന്ധി. പ്രധാനമന്ത്രി ഭീരുവാണെന്നു പറഞ്ഞ അദ്ദേഹം, സ്വന്തം ഇമേജ് സംരക്ഷിക്കാനായി മോദി ഇന്ത്യയുടെ 1,200 ചതുരശ്ര കിലോമീറ്റര്‍ ഭൂമി ചൈനയ്ക്കു വിട്ടുകൊടുത്തെന്നും ആരോപിച്ചു. കോണ്‍ഗ്രസായിരുന്നു ഭരണത്തിലെങ്കില്‍ ചൈനയെ നേരിടാന്‍ 15 മിനുട്ട് മതിയാകുമായിരുന്നുവെന്നും അദ്ദേഹം ഹരിയാനയില്‍ പറഞ്ഞു.കാര്‍ഷിക നിയമങ്ങള്‍ക്കെതിരേ രാഹുല്‍ഗാന്ധിയുടെ നേതൃത്വത്തില്‍ നടന്ന ട്രാക്ടര്‍ റാലി ഇന്നലെ ഹരിയാനയില്‍ സമാപിച്ചു. പഞ്ചാബില്‍നിന്നു ദിവസങ്ങള്‍ക്കു മുന്‍പ് ആരംഭിച്ച റാലി കഴിഞ്ഞ ദിവസം ഹരിയാന അതിര്‍ത്തിയില്‍ തടഞ്ഞിരുന്നെങ്കിലും പ്രതിഷേധങ്ങളെ തുടര്‍ന്നു കടത്തിവിടുകയായിരുന്നു.
ലോകത്ത് മറ്റൊരു രാജ്യം സ്വന്തം രാജ്യത്തിന്റെ ഭൂമി കൊണ്ടുപോയത് നോക്കിനിന്ന രാജ്യം ഇന്ത്യയാണെന്നു പറഞ്ഞ അദ്ദേഹം, എന്നിട്ടും സ്വയം ദേശസ്‌നേഹിയെന്നു വിളിക്കാന്‍ മോദിക്കു നാണമില്ലേയെന്നും ചോദിച്ചു. ഇന്ത്യയുടെ ഭൂമി ചൈന കൈയേറിയതായി രാജ്യത്തെ ജനങ്ങള്‍ക്കറിയാമെന്നും കോണ്‍ഗ്രസായിരുന്നു ഭരണത്തിലെങ്കില്‍ ഇതു സംഭവിക്കുമായിരുന്നില്ലെന്നും അദ്ദേഹം ചൂണ്ടിക്കാട്ടി.