കണ്ണൂര്‍: പൗരന്റെ അവകാശങ്ങള്‍ സംരക്ഷിക്കുന്ന കാര്യത്തില്‍ കോടതികളുടെ ഭാഗത്തു നിന്നു വന്‍വീഴ്ചകള്‍ സംഭവിക്കുകയാണെന്ന് ഡോ. സെബാസ്റ്റിയന്‍ പോള്‍. കാരായി രാജനും ചന്ദ്രശേഖരനും നീതിതേടി ഡി.വൈ.എഫ്.ഐ ഇന്നുമുതല്‍ ആരംഭിക്കുന്ന നീതിയാത്രയുടെ ഭാഗമായി സംഘടിപ്പിച്ച മനുഷ്യാവകാശ സംഗമം ഉദ്ഘാടനം ചെയ്യുകയായിരുന്നു അദ്ദേഹം. കോടതിയാണ് നമ്മുടെ ശരണം. നമ്മുടെ അവകാശങ്ങളെല്ലാം കോടതികള്‍ സംരക്ഷിക്കുമെന്നാണ് നമ്മുടെ വിശ്വാസവും പ്രതീക്ഷയും. എന്നാല്‍ അത് സംഭവിക്കുന്നില്ല. കോടതിയിലേക്ക് നമ്മള്‍ ചെല്ലുന്നതുപോലും കോടതിക്ക് ഇഷ്ടമല്ല. സുപ്രീം കോടതിയില്‍ പോയ കേരള സര്‍ക്കാരിനോട് 25,000 രൂപ പിഴയായി ലീഗല്‍ സര്‍വിസസ് ഫണ്ടിലേക്ക് കെട്ടിവയ്ക്കാന്‍ പറഞ്ഞു. തടവും പിഴയും ശിക്ഷയാണ്. കോടതി പറയുന്നത് കോടതിയുടെ സമയം അനാവശ്യമായി ചെലവാക്കിയെന്നാണ്. അതെങ്ങനെയാണ് കോടതിയുടെ സമയം അനാവശ്യമായി ചെലവാക്കേണ്ടി വരുന്നത്. കോടതി കൂടുന്നതിനും ജഡ്ജിമാര്‍ ഇരിക്കുന്നതിനും സമയം ചെലവഴിക്കുന്നതിനുമെല്ലാം ശമ്പളം കൊടുക്കുന്നുണ്ടെന്നും സെബാസ്റ്റ്യന്‍ പോള്‍ കൂട്ടിച്ചേര്‍ത്തു. നിതിന്‍ കണിച്ചേരി അധ്യക്ഷനായി. ബിജു കണ്ടക്കൈ, കെ.വി സുമേഷ്, പി.പി ദിവ്യ, എം. വിജിന്‍, എസ്.കെ സജീഷ് സംസാരിച്ചു.