ലോക്‌സഭാ തെരഞ്ഞെടുപ്പിന്റെ ആദ്യത്തെ ഒന്നര മണിക്കൂറിന്റെ ഫലസൂചനകള്‍ പുറത്തുവരുമ്പോള്‍ എറണാകുളത്തും ആലത്തൂരിലും യു.ഡി.എഫ് മുന്നേറ്റം. യു.ഡി.എഫിന്റെ നിലവിലെ എം.പി കെ.വി തോമസിനു പകരക്കാരനായി വന്ന ഹൈബി ഈഡന്‍ എം.എല്‍.എയാണ് എറണാകുളത്ത് മുന്നേറ്റം തുടരുന്നത്. 41217 വോട്ടുകള്‍ക്കാണ് മുന്നിട്ടു നില്‍ക്കുന്നത്. മുന്‍ രാജ്യസഭാ എം.പി പി. രാജീവാണു രണ്ടാം സ്ഥാനത്ത്. എന്നാല്‍ എന്‍ഡിഎയുടെ സ്ഥാനാര്‍ഥി കേന്ദ്രമന്ത്രികൂടിയായ അല്‍ഫോണ്‍സ് കണ്ണന്താനം മൂന്നാം സ്ഥാനത്തു തുടരുകയാണ്.

അതേസമയം ആലത്തൂരില്‍ ആരോപണങ്ങളെ അതിജയിച്ച് രമ്യാ ഹരിദാസ് മുന്നിട്ടുനില്‍ക്കുകയാണ്. സംവരണ മണ്ഡലമായ ആലത്തൂരില്‍ സിറ്റിങ് എം.പിയായ എല്‍.ഡി.എഫ് സ്ഥാനാര്‍ഥി പി.കെ ബിജു ഒരുഘട്ടത്തില്‍ ലീഡ് ചെയ്‌തെങ്കിലും രമ്യ തന്നെ വീണ്ടും മുന്നോട്ടുവരികയായിരുന്നു.

52025 വോട്ടുകള്‍ക്കാണ് രമ്യ ലീഡ് ചെയ്തുകൊണ്ടിരിക്കുന്നത്.