കോഴിക്കോട് മണ്ഡലത്തില്‍ യു.ഡി.എഫിന് ലീഡ് ഉയരുന്നതില്‍ സന്തോഷം പ്രകടിപ്പിച്ച് സ്ഥാനാര്‍ഥി എം.കെ രാഘവന്‍. തന്റെ വിജയത്തിനു വേണ്ടി പ്രവര്‍ത്തിച്ച ലീഗ്, കോണ്‍ഗ്രസ്,വെല്‍ഫെയര്‍ പാര്‍ട്ടി പ്രവര്‍ത്തകര്‍ക്കും നന്ദി പറയുന്നതായും രാഘവന്‍ പ്രതികരിച്ചു.
തെരഞ്ഞെടുപ്പ് പ്രചാരണത്തിനിടെ ഉയര്‍ന്ന കോഴ വിവാദം രാഘവന്റെ പ്രതിച്ഛായയില്‍ മങ്ങലേല്‍പ്പിച്ചിരുന്നു.
തുടക്കം മുതല്‍ ലീഡ് നിലയില്‍ എല്‍.ഡി.എഫ് സ്ഥാനാര്‍ഥിയെക്കാള്‍ എറെ മുന്നിലായിരുന്നു രാഘവന്‍. നിലവിലെ കോഴിക്കോട് നോര്‍ത്ത് എം.എല്‍.എ കൂടിയായ പ്രദീപ് കുമാറിന് സ്വന്തം നിയമസഭാ മണ്ഡലത്തില്‍ പോലും ലീഡ് നേടാന്‍ കഴിഞ്ഞിട്ടില്ല. ബി.ജെപി സ്ഥാനാര്‍ഥി അഡ്വ. പ്രകാശ് ബാബുവാണ് മൂന്നാം സ്ഥാനത്ത്. മണ്ഡലത്തിലെ നിലവിലെ എം.പി കൂടിയായ രാഘവന്‍ മൂന്നാം തവണയാണ് കോഴിക്കോട് മത്സരിക്കുന്നത്.