ന്യൂഡല്‍ഹി: ബി.ജെ.പിയില്‍ ചേരുമെന്ന ശക്തമായ അഭ്യൂഹങ്ങള്‍ക്കിടെ നടി ഖുശ്ബു കോണ്‍ഗ്രസില്‍ നിന്ന് രാജിവെച്ചു. പാര്‍ട്ടി അധ്യക്ഷ സോണിയ ഗാന്ധിക്ക് ഖുശ്ബു രാജിക്കത്ത് കൈമാറി. താരത്തെ എ.ഐ.സി.സി വക്താവ് സ്ഥാനത്തുനിന്ന് മാറ്റിയതായി കോണ്‍ഗ്രസ് അറിയിച്ചു.

കഴിഞ്ഞ കുറച്ചു കാലമായി കോണ്‍ഗ്രസ് തമിഴ്നാട് ഘടകവുമായി ഖുശ്ബു അകല്‍ച്ചയിലായിരുന്നു. ലോക്സഭാ തെരഞ്ഞെടുപ്പില്‍ സീറ്റ് നല്‍കാത്തതിലെ അതൃപ്തിയും ഇതിനു കാരണമായിരുന്നു.

ഏറെക്കാലത്തെ ആലോചനക്ക് ശേഷമാണ് പാര്‍ട്ടി വിടാനുള്ള തീരുമാനം കൈക്കൊണ്ടത്. രാഹുല്‍ ഗാന്ധിയോടും പാര്‍ട്ടിയിലെ മറ്റെല്ലാ സഹപ്രവര്‍ത്തകരോടും ഈ അവസരത്തില്‍ നന്ദി പറയുന്നു. കോണ്‍ഗ്രസിന്റെ വക്താവായും അംഗമായും രാജ്യത്തെ സേവിക്കാന്‍ അവസരം നല്‍കിയതിലെ എല്ലാവരോടുമുള്ള കടപ്പാടും അറിയിക്കുന്നു. ' സോണിയ ഗാന്ധിക്ക് അയച്ച രാജിക്കത്തില്‍ ഖുശ്ബു പറഞ്ഞു.

2010ല്‍ ഡി.എം.കെ.യിലൂടെ ആയിരുന്നു ഖുശ്ബുവിന്റെ രാഷ്ട്രീയ പ്രവേശനം. ജനങ്ങളെ സേവിക്കാനും സ്ത്രീകളുടെ ഉന്നമനത്തിനായി പ്രവര്‍ത്തിക്കാനും ആഗ്രഹമുണ്ടെന്ന് പറഞ്ഞാണ് ഖുശ്ബു ഡി.എം.കെയിലെത്തിയത്. 2014ല്‍ ഡി.എം.കെ വിട്ട് കോണ്‍ഗ്രസിലെത്തി.

മഹാരാഷ്ട്രയിലെ മുസ്‌ലിം കുടുംബത്തില്‍ ജനിച്ച ഖുശ്ബു സമൂഹമാധ്യമങ്ങളിലൂടെ സംഘ്പരിവാറിന്റെ വംശീയ അധിക്ഷേപങ്ങള്‍ക്കിരയായിരുന്നു. തമിഴ് സംവിധായകനും നടനുമായ സുന്ദര്‍സിയാണ് ഖുശ്ബുവിന്റെ ഭര്‍ത്താവ്.