പനാജി: പനാജി ഉപതെരഞ്ഞെടുപ്പില്‍ ബി.ജെ.പിക്കുണ്ടായ പരാജയത്തില്‍ പാര്‍ട്ടി ആത്മപരിശോധന നടത്തണമെന്ന് ഗോവ മുന്‍മുഖ്യമന്ത്രി മനോഹര്‍ പരീക്കറുടെ മകന്‍ ഉത്പല്‍ പരീക്കര്‍.
മനോഹര്‍ പരീക്കര്‍ കഴിഞ്ഞ 25 വര്‍ഷമായി നിലനിര്‍ത്തിപ്പോന്ന മണ്ഡലമായ പനാജി ഇക്കഴിഞ്ഞ ഉപതെരഞ്ഞെടുപ്പില്‍ ബി.ജെ.പിക്ക് കൈവിട്ടുപോകുകയായിരുന്നു. കോണ്‍ഗ്രസ് സ്ഥാനാര്‍ഥി അത്തനാസിയോ മോണ്‍സെറാത്തെയാണ് ഇവിടെ വിജയിച്ചത്. ബി.ജെ.പി സ്ഥാനാര്‍ഥി സിദ്ധാര്‍ഥ് കുന്‍കിലിയേക്കറെ 1,700 വോട്ടുകള്‍ക്കാണ് കോണ്‍ഗ്രസ് സ്ഥാനാര്‍ഥിയോട് പരാജയപ്പെട്ടത്.
ബി.ജെ.പി തയാറാക്കിയ സ്ഥാനാര്‍ഥിപ്പട്ടികയില്‍ ഉത്പല്‍ പരീക്കറുടെ പേരും ഉള്‍പ്പെട്ടിരുന്നു. എന്നാല്‍ പിന്നീട് സിദ്ധാര്‍ഥിനെ സ്ഥാനാര്‍ഥിയായി നിയോഗിക്കുകയായിരുന്നു. തെരഞ്ഞെടുപ്പ് പ്രചാരണത്തില്‍ ഉത്പല്‍ പരീക്കറും സജീവമായി രംഗത്തുണ്ടായിരുന്നു. ഇവിടെ പരാജയം ഉണ്ടായ സാഹചര്യത്തില്‍ അടുത്ത തെരഞ്ഞെടുപ്പിലെങ്കിലും വിജയിക്കാനുള്ള മാര്‍ഗം പാര്‍ട്ടി നേതൃത്വം ആലോചിക്കണമെന്നും അദ്ദേഹം ആവശ്യപ്പെട്ടു.