ചെന്നൈ: ഇന്ത്യയെന്നാല്‍ ഹിന്ദി മാത്രം സംസാരിക്കുന്ന സംസ്ഥാനങ്ങളല്ലെന്ന് ബി.ജെ.പിയോട് ഡി.എം.കെ അധ്യക്ഷന്‍ എം.കെ സ്റ്റാലിന്‍. ഹിന്ദി സംസാരിക്കുന്ന സംസ്ഥാനങ്ങള്‍ മാത്രമാണ് ഇന്ത്യ രൂപീകരിച്ചത് എന്ന തരത്തിലാണ് ഇപ്പോള്‍ കാര്യങ്ങള്‍ നടക്കുന്നത്.
കേന്ദ്രത്തിലുള്ള ഒരു സര്‍ക്കാരിനും ഏതെങ്കിലുമൊരു സംസ്ഥാനത്തെ അവഗണിച്ചു മുന്നോട്ടുപോവാന്‍ കഴിയില്ല. എല്ലാ സംസ്ഥാനങ്ങളെയും ഒന്നിപ്പിച്ച് മുന്നോട്ടുപോവേണ്ട സമയമായിരിക്കുന്നു- അദ്ദേഹം പറഞ്ഞു. സംസ്ഥാനങ്ങള്‍ക്ക് നിര്‍ണായക പങ്കുള്ള ക്രിയാത്മക രാഷ്ട്രീയമാണ് ഇനി വേണ്ടത്. തമിഴ് ജനതയുടെ താല്‍പ്പര്യം പാര്‍ലമെന്റിലും നിയമസഭയിലും ഡി.എം.കെ ഒരുപോലെ ഉയര്‍ത്തിപ്പിടിക്കുമെന്നും അദ്ദേഹം പറഞ്ഞു. ചെന്നൈയില്‍ പാര്‍ട്ടി പ്രവര്‍ത്തകരെ അഭിസംബോധന ചെയ്യുകയായിരുന്നു സ്റ്റാലിന്‍.

തമിഴ്‌നാട്ടില്‍ കോണ്‍ഗ്രസും ഡി.എം.കെയും ചേര്‍ന്നുള്ള സഖ്യം സംസ്ഥാനം തൂത്തുവാരിയെങ്കിലും മറ്റു സംസ്ഥാനങ്ങളില്‍ കോണ്‍ഗ്രസ് തകര്‍ന്നടിഞ്ഞ നിരാശയില്‍ പ്രവര്‍ത്തകര്‍ ഇരിക്കുമ്പോഴാണ് സ്റ്റാലിന്റെ പ്രസ്താവന. തെരഞ്ഞെടുപ്പില്‍ സംസ്ഥാനത്തുനിന്ന് ബി.ജെ.പിക്ക് ഒരുസീറ്റ് പോലും ലഭിച്ചിരുന്നില്ല.

കോണ്‍ഗ്രസിന് ഭൂരിപക്ഷം നേടി കേന്ദ്രത്തില്‍ സര്‍ക്കാരുണ്ടാക്കാന്‍ കഴിഞ്ഞിരുന്നെങ്കില്‍ തങ്ങള്‍ പ്രകടനപത്രികയില്‍ മുന്നോട്ടുവച്ച കാര്യങ്ങള്‍ നടപ്പാക്കാന്‍ കഴിയുമായിരുന്നുവെന്ന് ഡി.എം.കെ പ്രവര്‍ത്തകര്‍ വിശ്വസിക്കുന്നുണ്ട്. എന്നാല്‍, പുതിയ സാഹചര്യത്തില്‍ കേന്ദ്രത്തിലെ ബി.ജെ.പി സര്‍ക്കാരിനോടും സംസ്ഥാനത്തെ അണ്ണാ ഡി.എം.കെ സര്‍ക്കാരിനോടും ഒരുപോലെ ഏറ്റുമുട്ടേണ്ട സാഹചര്യമാണ് ഡി.എം.കെക്ക് വന്നിരിക്കുന്നത്.