റിയാദ്: വിവിധ സീസണ്‍ ആഘോഷത്തിലേക്ക് മറ്റൊരു സീസണ്‍ കൂടി എത്തുന്നു. വസന്തം, ഹേമന്തം, വേനല്‍ക്കാലം എന്നിവയിലേക്ക് ആഘോഷങ്ങളുടെ കാലമായാണ് ഈദ് സീസണും വന്നെത്തുന്നത്. സഊദിയിലെ സീസണുകളുടെ ഉന്നതാധികാര സമിതിയാണ് പുതിയ തീരുമാനം കൈ ക്കൊണ്ടത്. ഇതോടെ കാലാവസ്ഥ മാറ്റത്തിലൂടെ സീസണുകള്‍ അറിയപ്പെടുമ്പോള്‍ സന്തോഷത്തിന്റെ കാലമായി ആഘോഷത്തിനും ആഹ്ലാദത്തിനുമായി ഈദ് സീസണും ആഘോഷിക്കപ്പെടും.
'മൗസം അല്‍ ഈദ്' എന്നറിയപ്പെടുന്ന ഈ സീസണില്‍ ലോകമാകെ സ്‌നേഹവും സന്തോഷവും വ്യാപിപ്പിക്കുന്നതിനും ജീവിതം സന്തോഷത്തില്‍ ആറാടിക്കുന്നതിനുമായി പെരുന്നാളിനെ മാറ്റുകയും ഈ സന്ദേശം വ്യാപിക്കുകയും ചെയ്യുകയാണ് പുതിയ തീരുമാനത്തിന്റെ ലക്ഷ്യം. മനോഹരമായി രൂപ കല്‍പ്പന ചെയ്ത ലോഗോയില്‍ വ്യക്തമാക്കുന്നത് പോലെ തന്നെ പെരുന്നാളിനെ സഹന, സ്‌നേഹ സന്ദേശം മാലോകര്‍ക്ക് പകര്‍ന്നു നല്‍കുകയും ഇസ്ലാമിക ഉന്നത മൂല്യങ്ങള്‍ ഉയര്‍ത്തിപിടിക്കുന്നതില്‍ സഊദി പുതിയൊരു കാല്‍വയ്പ്പാണ് നടത്തുന്നതെന്നും പുതിയ സീസണ്‍ രൂപകല്‍പ്പന ചെയ്ത സീസണ്‍ സമിതി വ്യക്തമാക്കി. ഇതിന്റെ സന്ദേശം പ്രചരിപ്പിക്കാനും ഔദ്യോഗിക മാധ്യമങ്ങളില്‍ അകൗണ്ടുകളും വെബ്സൈറ്റും ആരംഭിക്കുകയും ചെയ്തിട്ടുണ്ട്.
സഊദി ദേശീയ പരിവര്‍ത്തിത പദ്ധതിയായ സഊദി വിഷന്‍ 2030 ന്റെ ഭാഗമായാണ് പുതിയ സീസണ് അധികൃതര്‍ രൂപം നല്‍കിയത്. ജനങ്ങളുടെ ജീവിതത്തിനു സന്തോഷവും സംതൃപ്തിയും വാണിജ്യ മേഖലക്ക് പുരോഗതിയും നല്‍കുന്നതിന് മറ്റു സീസണുകള്‍ നല്‍കുന്ന സംഭാവനകള്‍ പോലെ തന്നെ പുതിയ സീസണും ഭാഗവാക്കാകും. പുതിയ സീസണയായ ഈദ് സീസണ്‍ ലോകോത്തര നിലവാരത്തില്‍ അഭൂതപൂര്‍വമായ ആഘോഷ പരിപാടികളും സംഘടിപ്പിക്കും.