കൊല്ലം: കോണ്‍ഗ്രസ് അധ്യക്ഷ സ്ഥാനത്തേക്ക് പുതിയ ഒരാള്‍ വരണമെന്ന് രഹുല്‍ ഗാന്ധി പറഞ്ഞത് ശരിയാണെങ്കിലും മോദിയെ എതിര്‍ക്കാന്‍ രാജ്യത്ത് മറ്റാരുണ്ടെന്ന് കാസര്‍കോട് നിയുക്ത എം.പി രാജ്‌മോഹന്‍ ഉണ്ണിത്താന്‍. കൊല്ലം പ്രസ്‌ക്ലബ് സംഘടിപ്പിച്ച മുഖാമുഖം പരിപാടിയില്‍ സംസാരിക്കുകയായിരുന്നു അദ്ദേഹം. കോണ്‍ഗ്രസ് പ്രസിഡന്റ് സ്ഥാനത്ത് രാഹുല്‍ ഗാന്ധി തന്നെ തുടരണം.
തെരഞ്ഞടുപ്പില്‍ വിജയിച്ചെങ്കിലും എല്ലാവരെയും എല്ലാക്കാലത്തും മോദിക്ക് പറ്റിക്കാനാകില്ലെന്ന് ഉണ്ണിത്താന്‍ പറഞ്ഞു. തന്റെ നെറ്റിയിലെ കുറി വിവാദമാക്കിയാല്‍ ഇനി അത് ഉപേക്ഷിക്കും. സി.പി.എമ്മിന്റെയും ബി.ജെ.പിയുടെയും ഡോക്ടര്‍മാര്‍ വന്നു പരിശോധിച്ചാല്‍ അവര്‍ക്ക് മനസിലാകും താന്‍ നെറ്റിയില്‍ കുറി ഉപയോഗിക്കാത്തതിന്റെ കാരണം. പുതിയ സിനിമയില്‍ അഭിനയിക്കാന്‍ ക്ഷണം ലഭിച്ചിട്ടുണ്ട്. ഇതിനകം അഭിനയിച്ച 20 ചിത്രങ്ങളില്‍ മുഖ്യമന്ത്രിയുടെ വേഷവും ഉണ്ടായിരുന്നെന്നും ഉണ്ണിത്താന്‍ കൂട്ടിച്ചേര്‍ത്തു.