ചെറുതുരുത്തി: ഊട്ടി കൂനൂര്‍ കൊലകൊമ്പയില്‍ കഴിഞ്ഞ ദിവസം കത്തിനശിച്ചത് കേരള കലാമണ്ഡലം കല്‍പ്പിത സര്‍വകലാശാലയിലെ വിദ്യാര്‍ഥികള്‍ സഞ്ചരിച്ചിരുന്ന കാര്‍. കലാമണ്ഡലം ബിരുദ വിദ്യാര്‍ഥികളായ കോട്ടയം സ്വദേശി രാഹുല്‍ നമ്പ്യാര്‍ (22), ഇരിങ്ങാലക്കുട സ്വദേശി ജിനേഷ് (21), കൊളപ്പുള്ളി സ്വദേശി രാഹുല്‍ (21), ഷൊര്‍ണൂര്‍ സ്വദേശി അഖില്‍ (25) എന്നിവരാണ് കാറില്‍ ഉണ്ടായിരുന്നത്.
മേട്ടുപാളയത്ത് ക്ഷേത്ര ഉത്സവത്തിലെ പഞ്ചവാദ്യത്തില്‍ പങ്കെടുക്കാന്‍ എത്തിയതായിരുന്നു വിദ്യാര്‍ഥികള്‍. പഞ്ചവാദ്യം കഴിഞ്ഞതിന് ശേഷം ഊട്ടി കണ്ട് മടങ്ങുന്നതിനിടെ കൂനൂരിനടുത്ത് കൊലകൊമ്പ ഭാഗത്ത് വച്ച് കാര്‍ നിയന്ത്രണം വിടുകയും മറിയുകയുമായിരുന്നു.
വാഹനത്തില്‍ നിന്ന് പുക ഉയര്‍ന്നതോടെ പരിഭ്രാന്തരായ വിദ്യാര്‍ഥികള്‍ വാഹനം ഉപേക്ഷിച്ച് ഓടി രക്ഷപ്പെട്ടു. ഇവരുടെ ഫോണടക്കമുള്ള വില പിടിപ്പുള്ള സാധന സാമഗ്രികള്‍ കത്തിനശിച്ചു. ഇതിനിടയില്‍ ഫയര്‍ഫോഴ്‌സ് എത്തിയാണ് തീ കെടുത്തിയത്. അപകടത്തില്‍ പെട്ട വാഹനം ആരുടേതെന്ന് അറിയാത്തത് സ്ഥലത്ത് പരിഭ്രാന്തി പരത്തി.
വാഹനത്തില്‍ സഞ്ചരിച്ചിരുന്നത് മാവോയിസ്റ്റുകളാണെന്ന ആശങ്കയും പരന്നു. പിന്നീട് ഇവര്‍ പൊലിസില്‍ ഹാജരായതോടെയാണ് ആശങ്കകള്‍ക്ക് പരിഹാരമായത്.