തിരുവനന്തപുരം: 2014 ല്‍ നിയമസഭ പാസാക്കിയ കേരള മാരിടൈം ബോര്‍ഡ് ബില്‍ ഗവര്‍ണര്‍ തിരിച്ചയച്ചു.  ബില്‍ പിന്‍വലിക്കണമെന്നാവശ്യപ്പെട്ടാണ് ബില്‍ തിരിച്ചയച്ചത്. നേരത്തെ കേന്ദ്ര ആഭ്യന്തര മന്ത്രാലയം എതിര്‍പ്പ് പ്രകടിപ്പിച്ചതിനെ തുടര്‍ന്ന് പുന:പരിശോധിക്കണമെന്നാവശ്യപ്പെട്ട് രാഷ്ട്രപതി ബില്‍ മടക്കി അയച്ചിരുന്നു.

രാഷ്ട്രപതി പുന:പരിശോധിക്കണമെന്ന് പറഞ്ഞ ബില്‍ മടക്കി അയക്കുന്നത് ശരിയാണോ എന്ന് പ്രതിപക്ഷ നേതാവ് രമേശ് ചെന്നിത്തല സഭയില്‍ ചോദിച്ചു. രാഷട്രപതി പുന:പരിശോധിക്കണമെന്നും ഗവര്‍ണര്‍ പിന്‍വലിക്കണമെന്നും പറയുന്നതില്‍ ഭരണഘടനാപരമായി പ്രശ്‌നമുണ്ടെന്നും അദ്ദേഹം ചൂണ്ടിക്കാട്ടി.  ക്രമപ്രശ്‌നം ഉന്നയിക്കേണ്ടതില്ലെന്നും  നിയമോപദേശം തേടിയിട്ടാണ് പുന:പരിശോധിക്കാന്‍ നിര്‍ദ്ദേശം നല്‍കിയിരുന്നതെന്ന് മന്ത്രി എ.കെ ബാലന്‍ പറഞ്ഞു.

ബില്ലിന് അംഗീകാരം ലഭിച്ചാല്‍ തീരദേശ സുരക്ഷ ഉള്‍പ്പെടെയുള്ള എല്ലാ തുറമുഖങ്ങളുടെയും പ്രവര്‍ത്തനം മാരിടൈം ബോര്‍ഡിനു കീഴിലാവും. നാവികസേനയുടെയും തീരസംരക്ഷണ സേനയുടെയും പ്രാതിനിധ്യം ബോര്‍ഡില്‍ ഉറപ്പാക്കിയിട്ടുണ്ട്. ചെറുകിട തുറമുഖങ്ങളുടെ വാണിജ്യപരവും നിയമപരവുമായ ചുമതലകള്‍ മാരിടൈം ബോര്‍ഡുകളില്‍ നിക്ഷിപ്തമാണ്. പൂര്‍ണമായും സ്വയംഭരണാധികാരമുള്ളതിനാല്‍ സര്‍ക്കാര്‍ വകുപ്പുകളെക്കാള്‍ കൂടുതല്‍ സാമ്പത്തിക സ്വാതന്ത്ര്യം ബോര്‍ഡിനുണ്ടാകും. മാരിടൈം മേഖലകളെ നിയന്ത്രിക്കേണ്ടതും അവയുടെ പുരോഗതിയെ ഏകോപിപ്പിക്കേണ്ടതും ബോര്‍ഡിന്റെ ചുമതലയാണെന്നും ബില്ലില്‍ വ്യവസ്ഥ ചെയ്യുന്നു.