കോഴിക്കോട്: ഒരേ റിയാലിറ്റി ഷോയില്‍ പങ്കെടുത്ത നാലുപേര്‍. ഇതില്‍ മൂന്നുപേര്‍ ഒരേ കോളജില്‍ പഠിച്ചവര്‍. ഇവരില്‍ രണ്ടുപേര്‍ വീതം മത്സരഫലം പുറത്തുവന്നപ്പോള്‍ ആണ്‍കുട്ടികളുടെയും പെണ്‍കുട്ടികളുടെയും വിഭാഗത്തില്‍ വിജയികളാവുക. ഇന്നലെ നടന്ന മാപ്പിളപ്പാട്ട് മത്സരമാണ് താരത്തിളക്കവും അല്‍പം കൗതുകവും കൊണ്ട് കാണികളുടെ ശ്രദ്ധയാകര്‍ഷിച്ചത്.
പതിനാലാം രാവ് റിയാലിറ്റി ഷോയില്‍ പങ്കെടുത്ത ആര്‍.വി അനുനന്ദയും എം. മുര്‍ഷിദും സുല്‍ഫയും പി. മുഹമ്മദ് അജ്മലുമാണ് ഇന്റര്‍സോണ്‍ കലോത്സവ വേദിയില്‍ മത്സരാര്‍ഥികളായെത്തിയത്. ഇതില്‍ അനുനന്ദ ഫാറൂഖ് കോളജ് വിദ്യാര്‍ഥിയും മറ്റ് മൂന്നുപേര്‍ മമ്പാട് എം.ഇ.എസ് കോളജ് വിദ്യാര്‍ഥികളുമാണ്. പെണ്‍കുട്ടികളുടെ വിഭാഗത്തില്‍ അനുനന്ദയും സുല്‍ഫയും ഒന്നാം സ്ഥാനം പങ്കിട്ടപ്പോള്‍ ആണ്‍കുട്ടികളുടെ വിഭാഗത്തിലും കൂട്ടുകാര്‍ ഒരുമിച്ചായി. മുര്‍ഷിദും സുല്‍ഫയും പതിനാലാം രാവ് മൂന്നാം സീസണിലു മുഹമ്മദ് അജ്മലു അനുനന്ദയും സീസണ്‍ നാലിലുമാണ് മാറ്റുരച്ചത്.
മലപ്പുറം പത്തിപ്പാറ അഹമ്മദിന്റെയും സഫിയയുടെയും മകനാണ് മുര്‍ഷിദ്. സി സോണ്‍ കലോത്സവത്തില്‍ നിന്ന് അപ്പീല്‍ വഴിയെത്തിയ അജ്മല്‍ മലപ്പുറം ഹാജിയാര്‍ പള്ളി സ്വദേശിയായ മുഹമ്മദലിയുടെയും മുംതാസിന്റെയും മകനാണ്. ആദ്യമായി ഇന്റര്‍സോണ്‍ കലോത്സവത്തിനെത്തിയ സുല്‍ഫ മഞ്ചേരി വെരണി സ്വദേശികളായ ഹനീഫയുടെയും ഹഫ്‌സത്തിന്റെയും മകളാണ്. ഇന്നു നടക്കുന്ന ഒപ്പന മത്സരത്തിലും സുല്‍ഫ പങ്കെടുക്കുന്നുണ്ട്. കഴിഞ്ഞ തവണ ഇന്റര്‍സോണ്‍ കലാതിലകമായ അനുനന്ദ മാപ്പിളപ്പാട്ടില്‍ തുടര്‍ച്ചയായി രണ്ടാം തവണയാണ് ഒന്നാമതെത്തുന്നത്. ഫാറൂഖ് കോളജില്‍ ഇംഗ്ലീഷില്‍ ബിരുദാനന്തര ബിരുദ വിദ്യാര്‍ഥിയായ അനുനന്ദയുടെ പിതാവ് കക്കട്ടില്‍ വേണു, മാതാവ് രത്‌നവല്ലി.