പയ്യന്നൂര്‍: കഴിഞ്ഞ ജൂലൈയില്‍ നടന്ന ഇരട്ടകൊലപാതകത്തിന്റെയും തുടര്‍ന്നുണ്ടായ അക്രമ പരമ്പരകളുടെയും നടുക്കം വിട്ടൊഴിയുന്നതിനു മുമ്പെ പയ്യന്നൂരിനെ ഭീതിയിലാഴ്ത്തി വീണ്ടും കൊലപാതകം. പയ്യന്നൂരിന്റെ സമാധാന ജീവിതത്തില്‍ കരിനിഴല്‍ വീഴ്ത്തി 10 മാസത്തിനിടെ മൂന്നു കൊലപാതകങ്ങളാണ് അരങ്ങേറിയത്. കഴിഞ്ഞ ജൂലൈ 11നാണ് കുന്നരുവില്‍ സി.പി.എം പ്രവര്‍ത്തകന്‍ സി.വി ധനരാജ് കൊല്ലപ്പെട്ടത്. രാത്രിയില്‍ ബൈക്ക് നിര്‍ത്തി വീട്ടിലേക്കു പോകുമ്പോഴാണ് ധനരാജിനെ വെട്ടിക്കൊലപ്പെടുത്തിയത്. ഇതിനു പിന്നാലെ മണിക്കൂറിന്റെ ഇടവേളയില്‍ അന്നൂരിലെ ബി.എം.എസ് പ്രവര്‍ത്തകനും ഓട്ടോ ഡ്രൈവറുമായ സി.കെ രാമചന്ദ്രനെയും വീട്ടില്‍ കയറി വെട്ടിക്കൊലപ്പെടുത്തി. സംഭവത്തെ തുടര്‍ന്ന് പയ്യന്നൂരിലും പരിസര പ്രദേശത്തും പരക്കെ അക്രമങ്ങള്‍ അരങ്ങേറി. 15ഓളം വീടുകള്‍ തകര്‍ത്തു. അത്രതന്നെ വാഹനങ്ങളും പൂര്‍ണമായും ഭാഗികമായും തകര്‍ക്കപ്പെട്ടു. ധനരാജ് വധക്കേസില്‍ എട്ട് ബി.ജെ.പി പ്രവര്‍ത്തകരും രാമചന്ദ്രന്‍ വധക്കേസില്‍ 10 സി.പി.എം പ്രവര്‍ത്തകരുമാണ് അറസ്റ്റിലായത്. ഇവരെല്ലാം പിന്നീട് ജാമ്യത്തിലിറങ്ങി. അക്രമസംഭവങ്ങളില്‍ അറസ്റ്റിലായ സി.പി.എം-ബി.ജെ.പി പ്രവര്‍ത്തകരും അധികം കാലതാമസമില്ലാതെ ജാമ്യം ലഭിച്ചു പുറത്തെത്തി. പിന്നെയും മാസങ്ങള്‍ കഴിഞ്ഞാണു പയ്യന്നൂരിന്റെ ജീവിതം സാധാരണ നിലയിലെത്തിയത്. സമാധാന ശ്രമങ്ങളുമായി നിരവധി സംഘടനകള്‍ രംഗത്തുവന്നിരുന്നു.
ധനരാജ് വധക്കേസിലെ 12ാം പ്രതിയാണ് കൊല്ലപ്പെട്ട ബിജു. ജാമ്യത്തിലിറങ്ങിയതിനു ശേഷം ബിജുവിനു നിരവധി വധഭീഷണിയുണ്ടായിരുന്നു. ഇതിനെ തുടര്‍ന്ന് ഏര്‍പ്പെടുത്തിയ പൊലിസ് സുരക്ഷ വ്യാഴാഴ്ചയാണ് പിന്‍വലിച്ചത്. തൊട്ടടുത്ത ദിവസംതന്നെ ബിജു കൊല്ലപ്പെടുകയും ചെയ്തു.
സി.പി.എം പ്രവര്‍ത്തകരാണ് കൊലപാതകത്തിനു പിന്നിലെന്നാണ് ബി.ജെ.പിയുടെ ആരോപണം. എന്നാല്‍ സംഭവത്തില്‍ സി.പി.എമ്മിനു പങ്കില്ലെന്ന് സി.പി.എം പയ്യന്നൂര്‍ ഏരിയാ സെക്രട്ടറി ടി.ഐ മധുസൂദനന്‍ അറിയിച്ചു. പ്രതികളെ കണ്ടെത്തുന്നതിനുള്ള നടപടികള്‍ പൊലിസ് കാര്യക്ഷമമാക്കണമെന്നും മധുസൂദനന്‍ ആവശ്യപ്പെട്ടു.