യാങ്കൂണ്‍: മുസ്‌ലിംകളെ റോഹിംഗ്യരെന്ന് മുദ്രകുത്തി ആക്രമിക്കുന്നുവെന്ന പരാതിയില്‍ രണ്ട് ബുദ്ധ തീവ്രവാദികളെ മ്യാന്‍മര്‍ അറസ്റ്റ് ചെയ്തു. ദേശീയവാദികളെന്നറിയപ്പെടുന്ന തീവ്ര ബുദ്ധ നേതാക്കളാണ് അറസ്റ്റിലായത്. ഇവര്‍ക്കെതിരേ കഴിഞ്ഞ ദിവസം പൊലിസ് കേസെടുത്തിരുന്നു. മ്യാന്‍മറില്‍ മുസ്‌ലിം ഭൂരിപക്ഷമുള്ള നഗരമായ യാങ്കൂണില്‍ രണ്ട് മുസ്‌ലിം സ്‌കൂളുകള്‍ കഴിഞ്ഞ ദിവസം ബുദ്ധ തീവ്രവാദികള്‍ അടപ്പിച്ചിരുന്നു.
ഇവിടത്തെ മുസ്‌ലിംകള്‍ രാജ്യത്ത് അനധികൃതമായി താമസിക്കുന്ന റോഹിംഗ്യകളാണെന്ന് ആരോപിച്ചാണ് ഇവരുടെ നടപടി. മ്യാന്‍മറിന്റെ വാണിജ്യ തലസ്ഥാനമാണ് യാങ്കൂണ്‍. മുസ്‌ലിം- ബുദ്ധ സംഘര്‍ഷം മുന്നില്‍ കണ്ടാണ് സര്‍ക്കാര്‍ നടപടി. ബുദ്ധ തീവ്രവാദികളുടെ കേന്ദ്രങ്ങളിലും വ്യാപക റെയ്ഡ് നടന്നു. ദേശീയവാദികളുടെ സംഘടനയായ പാട്രിയോടിക് മോന്‍ക്‌സ് യൂനിയന്‍ (പി.എം.യു) ആസ്ഥാനത്തും റെയ്ഡ് നടന്നു. മുസ്‌ലിംകള്‍ തിങ്ങിതാമസിക്കുന്ന യാങ്കൂണ്‍ നഗരത്തിലെ പി.എം.യു ഫ്‌ളാറ്റുകളിലും പൊലിസ് പരിശോധന നടത്തി.
സംഘര്‍ഷത്തെ തുടര്‍ന്ന് ഇവിടെ പൊലിസ് ആകാശത്തേക്ക് വെടിവച്ചു. രണ്ടാഴ്ച മുന്‍പാണ് പ്രദേശത്തെ മുസ്‌ലിം സ്‌കൂളുകള്‍ ബുദ്ധര്‍ അടപ്പിച്ചത്. കഴിഞ്ഞ ദിവസം വൈകിട്ടാണ് രണ്ടു പേരെ അറസ്റ്റ് ചെയ്തതെന്ന് പൊലിസ് പറഞ്ഞു. അഞ്ചു പേര്‍ക്കെതിരേയാണ് കഴിഞ്ഞ ദിവസം കേസെടുത്തത്. ഇവരെ പിടികൂടാന്‍ ശ്രമം നടക്കുന്നുവെന്നും പൊലിസ് മേജര്‍ ഖിന്‍ മൗങ് ഓ അറിയിച്ചു. യാങ്കൂണിലെ മിന്‍ഹലാര്‍ താങ് ന്യോന്‍ത് ജില്ലയില്‍ കഴിഞ്ഞ ആഴ്ച ഇരുവിഭാഗവും തമ്മില്‍ സംഘര്‍ഷം രൂപപ്പെട്ടിരുന്നു. 13 മാസമായി തുടരുന്ന ആങ് സാന്‍ സൂക്കിയുടെ ഭരണത്തില്‍ ബുദ്ധ തീവ്രവാദി നേതാക്കള്‍ക്കെതിരേ നടപടിയെടുക്കുന്നത് ആദ്യമാണ്.
റോഹിംഗ്യകള്‍ക്കെതിരേയുള്ള ആക്രമണത്തില്‍ സര്‍ക്കാര്‍ ഒന്നും ചെയ്യുന്നില്ലെന്ന് ആഗോളതലത്തില്‍ മ്യാന്‍മര്‍ ഭരണകൂടവും ആങ് സാന്‍ സൂക്കിയും വിമര്‍ശനം നേരിട്ടിരുന്നു. 2012 മുതല്‍ രാജ്യത്ത് മുസ്‌ലിംകള്‍ക്കെതിരേ ബുദ്ധഭീകരരുടെ ആക്രമണം വര്‍ധിച്ചിട്ടുണ്ട്.