ജിദ്ദ: റിയാദില്‍ ജോലിയും ശമ്പളവുമില്ലാതെ ഒരു വര്‍ഷമായി ദുരിതത്തില്‍ കഴിയുന്ന 496 ഇന്ത്യന്‍ തൊഴിലാളികള്‍ക്ക് രാജ്യം വിടാന്‍ അനുമതി ലഭിച്ചു. ഇഖാമ കാലാവധി കഴിഞ്ഞതിനാല്‍ ഇവര്‍ക്ക് ഫൈനല്‍ എക്‌സിറ്റ് ലഭിച്ചിരുന്നില്ല. എന്നാല്‍ ഇന്ത്യന്‍ എംബസിയും തൊഴില്‍ മന്ത്രാലയവും ആഭ്യന്തര മന്ത്രാലയത്തെ സമീപിച്ചതോടെയാണ് ഇവര്‍ക്ക് എക്‌സിറ്റ് വിസ ലഭിച്ചത്.
സൈപ്രസ് ആസ്ഥാനമായി പ്രവര്‍ത്തിക്കുന്ന ജെ ആന്‍ഡ് പി ഗ്രൂപ്പിന് കീഴിലാണ് ഇവര്‍ ജോലി ചെയ്തിരുന്നത്. റിയാദ്, അല്‍ ഖര്‍ജ് എന്നിവിടങ്ങളിലുള്ള മൂന്ന് ക്യാംപുകളിലാണ് തൊഴിലാളികള്‍ കഴിയുന്നത്. ഇതില്‍ മലയാളികളും ഉള്‍പ്പെടും.
നാട്ടിലേക്ക് മടങ്ങുന്നവര്‍ക്ക് അടിയന്തര സഹായമായി 1,000 റിയാല്‍ വിതരണം ചെയ്യും. സഊദി തൊഴില്‍ മന്ത്രാലയം അനുവദിക്കുന്ന വിമാന ടിക്കറ്റിലാണ് ഇവര്‍ ഇന്ത്യയിലേക്ക് മടങ്ങുക.
അതേസമയം, ഫൈനല്‍ എക്‌സിറ്റ് വിസ നേടിയവര്‍ക്ക് പെരുന്നാളിന് മുന്‍പ് ഇന്ത്യയിലെത്താന്‍ കഴിയില്ല. യാത്രാ ടിക്കറ്റ് ലഭ്യമല്ലാത്തതാണ് കാരണം.
ദുരിതത്തിലായ തൊഴിലാളികള്‍ക്ക് ഇന്ത്യന്‍ എംബസിയും സന്നദ്ധ സംഘടനകളുമാണ് ഇതുവരെ ഭക്ഷണം വിതരണം ചെയ്തിരുന്നത്. സ്‌പോണ്‍സര്‍ഷിപ്പ് മാറി പുതിയ തൊഴില്‍ കണ്ടെത്താന്‍ ആഗ്രഹിക്കുന്നവര്‍ക്ക് അനുമതി നല്‍കിയിട്ടുണ്ട്.
ശമ്പള കുടിശികയും സേവനാനന്തര ആനുകൂല്യങ്ങളും കോടതി വിധി അനുസരിച്ച് എംബസി വഴി തൊഴിലാളികള്‍ക്ക് ലഭ്യമാക്കും. ഇതിനായി എംബസിക്ക് പവര്‍ ഓഫ് അറ്റോര്‍ണി സമര്‍പ്പിച്ചിട്ടുണ്ട്.