കൊല്‍ക്കത്ത: ബംഗാളില്‍ ബി.ജെ.പി പിടിച്ചെടുത്ത പാര്‍ട്ടി ഓഫീസ് തൃണമൂല്‍ കോണ്‍ഗ്രസ് തിരിച്ചു പിടിച്ചു. മെയ് 30ന് മുഖ്യമന്ത്രി മമതയുടെ നേതൃത്വത്തിലായിരുന്നു നടപടി. കാവി മാറ്റി പാര്‍ട്ടി ഓഫീസിന്റെ ചുമരില്‍ പെയിന്റ് ഉപയോഗിച്ച് തൃണമൂല്‍ ചിത്രം വരച്ചാണ് മമത മടങ്ങിയത്.

ബാരക്ക്പൂരില്‍ തൃണമൂല്‍ നേതാവായ ദിനേശ് ത്രിവേദിയെ പരാജയപ്പെടുത്തി എം.പിയായ അര്‍ജുന്‍ സിങിന്റെ അനുയായികളാണ് തൃണമൂലിന്റെ ഓഫീസ് കയ്യേറിയത്. ബംഗാളിലെ ലോക്‌സഭാ തെരഞ്ഞെടുപ്പ് ജയത്തിന് ശേഷം നിരവധി തൃണമൂല്‍ ഓഫീസുകള്‍ കാവിപെയിന്റടിച്ച് ബി.ജെ.പി പിടിച്ചെടുത്തിട്ടുണ്ടെന്നാണ് റിപ്പോര്‍ട്ടുകള്‍.

മെയ് 28ന് ശേഷം മുകുള്‍ റോയിയുടെ മകന്‍ സുഭ്രാംഗ്ഷു റോയ് ഉള്‍പ്പെടെയുള്ള തൃണമൂല്‍ എം.എല്‍.എമാരും 63 മുനിസിപ്പല്‍ കൗണ്‍സിലര്‍മാരും ബി.ജെ.പിയില്‍ ചേര്‍ന്നിരുന്നു.