ന്യൂഡല്‍ഹി: യെമന്‍ സ്വദേശിയെ കൊന്ന കേസില്‍ തടവില്‍ കഴിയുന്ന നിമിഷ പ്രിയയുടെ വധശിക്ഷ ഒഴിവാക്കാന്‍ കേന്ദ്ര സര്‍ക്കാര്‍ ഇടപെടല്‍. ഉന്നത തല ഇടപെടലിലൂടെ നിമിഷ പ്രിയയുടെ വധശിക്ഷ നടപ്പാക്കുന്നത് തടയാനുള്ള ശ്രമങ്ങളാണ് ഇപ്പോള്‍ നടന്നുകൊണ്ടിരിക്കുന്നത്. ബ്ലഡ്മണി ഉള്‍പ്പെടെയുള്ള നടപടികള്‍ സങ്കീര്‍ണമാകുന്നതാണ് വധശിക്ഷ ഒഴിവാക്കുന്നത് പ്രതിസന്ധിയിലാക്കുന്നത്.

നിമിഷ പ്രിയയുടെ വിഷയം വളരെ സൂക്ഷ്മമായി നിരീക്ഷിച്ചുവരികയാണ്. പ്രാദേശിക അധികാരികളുമായും യെമന്‍ പൗരന്റെ കുടുംബാംഗങ്ങളുമായും ബന്ധപ്പെടുന്നുണ്ടെന്നും സാധ്യമായ എല്ലാ സഹായങ്ങളും ചെയ്തിട്ടുണ്ടെന്നും അധികൃതര്‍ അറിയിച്ചു. എന്നാല്‍ നിമിഷ പ്രിയയുടെ വധശിക്ഷ നടപ്പാക്കുന്നതിനെക്കുറിച്ച് ഇന്ത്യന്‍ അധികൃതര്‍ക്കും കുടുംബത്തിനും ഇതുവരെ ഔദ്യോഗിക അറിയിപ്പുകളൊന്നും ലഭിച്ചിട്ടില്ലെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.

ALSO READ: നിമിഷപ്രിയയുടെ വധശിക്ഷ ജൂലൈ 16ന്; ജയിൽ അധികൃതർക്ക് പബ്ലിക് പ്രോസിക്യൂഷൻ വിഭാഗത്തിൽ നിന്നും ഉത്തരവ് ലഭിച്ചു

നിമിഷപ്രിയയുടെ വധശിക്ഷ സംബന്ധിച്ച് ഇതുവരെ ഔദ്യോഗിക അറിയിപ്പ് ലഭിച്ചിട്ടില്ലെന്ന് ഭര്‍ത്താവ് ടോമി തോമസ് അറിയിച്ചു. ചില മാധ്യമ റിപ്പോര്‍ട്ടുകള്‍ മാത്രമാണ് നിലവില്‍ ലഭ്യമായതെന്നും, യെമന്‍ പൗരന്റെ കുടുംബം ബ്ലഡ് മണി സ്വീകരിക്കുമെന്ന പ്രതീക്ഷയിലാണ് കുടുംബമെന്നും അദ്ദേഹം വ്യക്തമാക്കി. ഉന്നതതല ഇടപെടലുകളില്‍ വിശ്വാസമുണ്ടെന്നും ടോമി തോമസ് കൂട്ടിച്ചേര്‍ത്തു.

അതേസമയം നിമിഷപ്രിയയുടെ മോചനത്തിനായി നെന്മാറ എംഎല്‍എ കെ. ബാബുവിന്റെ നേതൃത്വത്തില്‍ 'സേവ് നിമിഷപ്രിയ ആക്ഷന്‍ കമ്മിറ്റി' രൂപീകരിച്ചു. വധശിക്ഷ നടപ്പാക്കാനുള്ള തീരുമാനം അതീവ ദുഃഖകരവും ദൗര്‍ഭാഗ്യകരവുമാണെന്ന് കെ. ബാബു പ്രതികരിച്ചു. കേന്ദ്രസംസ്ഥാന സര്‍ക്കാരുകള്‍ വിഷയത്തില്‍ സജീവമായി ഇടപെട്ടിട്ടുണ്ടെന്നും, എന്നാല്‍ യെമനില്‍ എംബസി പ്രവര്‍ത്തനങ്ങള്‍ പരിമിതമാണെന്നും അദ്ദേഹം ചൂണ്ടിക്കാട്ടി. യെമനിലെ ഗോത്രസമുദായങ്ങളാണ് പ്രധാന തീരുമാനങ്ങള്‍ എടുക്കുന്നതെന്നും, ഇതുസംബന്ധിച്ച് നിരവധി ചര്‍ച്ചകള്‍ നടന്നിട്ടുണ്ടെന്നും എംഎല്‍എ വ്യക്തമാക്കി.

നിമിഷപ്രിയയുടെ മോചനത്തിനായി യെമനിലെ മനുഷ്യാവകാശ പ്രവര്‍ത്തകനായ അഡ്വ. സാമുവല്‍ ഇന്ന് യെമനിലേക്ക് പുറപ്പെടുമെന്നും കെ. ബാബു അറിയിച്ചു. വിഷയത്തില്‍ തുടര്‍നടപടികള്‍ ഊര്‍ജിതമാക്കാനാണ് കമ്മിറ്റിയുടെ തീരുമാനം.

As the execution date of Nimisha Priya nears in Yemen, diplomatic efforts intensify to secure clemency. The Indian government states it is closely monitoring the situation and exploring all options.