ന്യൂഡല്‍ഹി: കേന്ദ്രസര്‍ക്കാരിന്റെ കര്‍ഷക-തൊഴിലാളി വിരുദ്ധ നയങ്ങള്‍ക്കെതിരായ അഖിലേന്ത്യാ പണിമുടക്ക് ആരംഭിച്ചു. ലേബര്‍ കോഡുകള്‍ പിന്‍വലിക്കുക, തൊഴില്‍ സമയം, വേതനം തുടങ്ങിയ തൊഴിലാളികളുടെ അവകാശങ്ങള്‍ നിഷേധിക്കുന്ന നരേന്ദ്രമോദി സര്‍ക്കാരിനെതിരെയാണ് സംയുക്ത തൊഴിലാളി സംഘടനകളുടെ പ്രതിഷേധം. 24 മണിക്കൂര്‍ നീണ്ടുനില്‍ക്കുന്ന പണിമുടക്കില്‍ കര്‍ഷകരും തൊഴിലാളികളും യുവജനസംഘടനകളും വിദ്യാര്‍ഥികളും സാമൂഹ്യ സംഘടനകളും ഐക്യദാര്‍ഢ്യം പ്രഖ്യാപിച്ചു.

കേരളത്തില്‍ കെഎസ്ആര്‍ടിസി സര്‍വീസുകളടക്കം സ്തംഭിക്കും. കൊച്ചിയില്‍ സമരക്കാര്‍ കോഴിക്കോട്ടേക്ക് പോകേണ്ട AC ലോ ഫ്‌ലോര്‍ ബസ് തടഞ്ഞു. പുലര്‍ച്ചെ അഞ്ചുമണിക്ക് കോഴിക്കോട്ടേക്ക് പോകേണ്ട ബസാണ് തടഞ്ഞത്.
കൊല്ലം ഡിപ്പോയില്‍ നിന്ന് പുറപ്പെടാനിരുന്ന മൂന്നാര്‍, എറണാകുളം അമൃത സര്‍വീസുകളും സമരക്കാര്‍ തടഞ്ഞുവച്ചു. റിസര്‍വേഷന്‍ യാത്രക്കാര്‍ ബസിലുണ്ടായിരുന്നു.സമരാനുകൂലികള്‍ കൊടികുത്തി ബസ് തടയുകയായിരുന്നു.

കോഴിക്കോട് ജില്ലയില്‍ ആദ്യ മണിക്കൂറുകളില്‍ പണിമുടക്ക് പൂര്‍ണമായിരുന്നു. സ്വകാര്യ ബസുകളും കെഎസ്ആര്‍ടിസിയും സര്‍വീസ് നടത്തുന്നില്ല. പണിമുടക്കിയ തൊഴിലാളികളും ജീവനക്കാരും വിവിധ കേന്ദ്രങ്ങളില്‍ പ്രതിഷേധ പരിപാടികള്‍ സംഘടിപ്പിക്കും.