തൊടുപുഴ: കെ.എം മാണിയുടെ മകളുടെ ഭര്‍ത്താവ് എം.പി ജോസഫ് കേരളാ കോണ്‍ഗ്രസ് നേതാവ് പി.ജെ ജോസഫ് എം.എല്‍.എയെ സന്ദര്‍ശിച്ചു. ഇന്നലെ രാവിലെയാണ് പി.ജെ ജോസഫിന്റെ പുറപ്പുഴയിലെ വീട്ടിലെത്തിയത്.
താന്‍ യു.ഡി.എഫില്‍ അടിയുറച്ച് നില്‍ക്കുമെന്നും കെ.എം മാണിയുടെ രാഷ്ട്രീയം എന്നും യു.ഡി.എഫിനൊപ്പമായിരുന്നുവെന്നും അദ്ദേഹം പറഞ്ഞു. പാലായില്‍ കെ.എം മാണിയുടെ മകള്‍ സാലിയെ ഉപതെരഞ്ഞെടുപ്പില്‍ സ്ഥാനാര്‍ഥിയാക്കാന്‍ നിര്‍ദേശിച്ചിരുന്നുവെന്നും ഇതവഗണിച്ച് മറ്റൊരാളെ സ്ഥാനാര്‍ഥിയാക്കിയതാണ് പരാജയകാരണമെന്നും കഴിഞ്ഞ ദിവസം പി.ജെ ജോസഫ് വ്യക്തമാക്കിയിരുന്നു.
എല്‍.ഡി.എഫുമായി ചേരാനുള്ള ജോസ് കെ. മാണിയുടെ തീരുമാനം തെറ്റായിപ്പോയെന്ന് എം.പി ജോസഫ് പ്രതികരിച്ചതിന് പിന്നാലെയാണ് അദ്ദേഹം ഇന്നലെ പി.ജെ ജോസഫിനെ കാണാനെത്തിയതെന്നതും ശ്രദ്ധേയമാണ്. അതേസമയം സന്ദര്‍ശനം വ്യക്തിപരമെന്നും രാഷ്ട്രീയ ലക്ഷ്യത്തോടെയല്ലെന്നും ഇരുവരും പ്രതികരിച്ചു.