കാട്ടാക്കട: ജീപ്പ് കട്ടപ്പുറത്തായതോടെ നെയ്യാര്‍ഡാം പൊലിസിന്റെ യാത്ര ബൈക്കിലായി. പരാതി അന്വേഷിക്കാനും പട്രോളിങിനും എസ്.ഐ പോകുന്നത് ബൈക്കിലാണ്.
കഴിഞ്ഞ രണ്ടു ദിവസമായി സ്റ്റേഷനിലെ ബൈക്കിലാണ് എസ്.ഐ ശ്രീകുമാറിന്റെ യാത്ര. ഇന്നലെ രാവിലെ ഒരു തൂങ്ങി മരണം നടന്ന വീട്ടില്‍ പൊലിസ് സംഘം എത്തിയത് ബൈക്കില്‍ ട്രിപ്പടിച്ച്. ജീപ്പ് അറ്റകുറ്റപണികള്‍ക്കായി വര്‍ക്ക് ഷോപ്പില്‍ കയറ്റിയോടെയാണ് ബൈക്ക് യാത്ര വേണ്ടി വന്നത്.
ജീപ്പ് എന്നു കിട്ടുമെന്ന് പോലും പറയാന്‍ കഴിയാത്ത നിലയാണ്. വിശാലമായ ഏര്യായുള്ളതാണ് നെയ്യാര്‍ഡാം . ഇവിടെ ഒരു പൊലിസ് ടൂറിസ്റ്റ് ഇന്‍ഫര്‍മേഷന്‍ സെന്ററും പ്രവര്‍ത്തിക്കുകയാണ്. അഗസ്ത്യവനത്തിലെ ആദിവാസി സെറ്റില്‍മെന്റുകളും നെയ്യാര്‍ഡാമിന്റെ പരിധിയില്‍വരും.
ജീപ്പ് ഇല്ലാതെയായതോടെ പട്രോളിങ് ഉള്‍പ്പടെ മുടങ്ങാനും സാധ്യതയേറി. ടൂറിസ്റ്റ് കേന്ദ്രമായ നെയ്യാര്‍ഡാമില്‍ പുതിയ ജീപ്പ് അനുവദിക്കണമെന്ന ആവശ്യം ആഭ്യന്തര വകുപ്പ് ഇതേ വരെ പരിഗണിച്ചിട്ടില്ല.