ചാവക്കാട്: മണത്തലയില്‍ എലിപ്പനി ബാധിച്ച് വയോധിക മരിച്ച സാഹചര്യത്തില്‍ ആരോഗ്യ വകുപ്പ് പ്രതിരോധ പ്രവര്‍ത്തനങ്ങള്‍ ഊര്‍ജ്ജിതമാക്കി.
വ്യാഴാഴ്ച്ച മണത്തല പുളിച്ചിറക്കെട്ട് പ്രദേശത്തെ 93 വീടുകളില്‍ ചാവക്കാട് താലൂക്ക് ആശുപത്രി പൊതുജനാരോഗ്യ വിഭാഗത്തിന്റെയും നഗരസഭയുടെയും നേതൃത്വത്തില്‍ പനി പടരാതിരിക്കാനുള്ള പ്രതിരോധ പ്രവര്‍ത്തനങ്ങളും ക്ലോറിനേഷന്‍, ബോധവല്‍ക്കരണം എന്നിവയും സംഘടിപ്പിച്ചു.
നഗരസഭാ കൗണ്‍സിലര്‍ പി.ഡി സുരേഷ് ബാബു, താലൂക്ക് ആശുപത്രി ഹെല്‍ത്ത് ഇന്‍സ്‌പെക്ടര്‍ സി.വി അജയ് കുമാര്‍ എന്നിവരുടെ നേതൃത്വലാണ് പ്രതിരോധ പ്രവര്‍ത്തനങ്ങള്‍ നടത്തിയത്. കഴിഞ്ഞ ദിവസം എലിപ്പനി വരാതിരിക്കാനുള്ള ഡോക്‌സി സൈക്ലിന്‍ മരുന്ന് വിതരണവും ചെയ്തു. ബുധനാഴ്ച്ച എലിപ്പനി ബാധിച്ച് ചികിത്സയിലായിരുന്ന മണത്തലയില്‍ താമസിച്ചിരുന്ന പാലക്കാട് തത്തമംഗലം സ്വദേശി വയോധിക മരിച്ചതിന്റെ പശ്ചാത്തലത്തിലാണ് പ്രദേശത്ത് പ്രതിരോധ പ്രവര്‍ത്തനങ്ങള്‍ ശക്തമാക്കിയത്.
കെ. ബിനോജ്, ജൂനിയര്‍ പബ്ലിക് ഹെല്‍ത്ത് നഴ്‌സുമാരായ പി.എസ്. മേരി, ഒ. ആതിര, ആര്‍. രേവതി, എസ്.ആര്‍. രശ്മി, ആഷാ പ്രവര്‍ത്തകരായ രമണി, ഹേന എന്നിവര്‍ പ്രതിരോധ പ്രവര്‍ത്തനങ്ങളില്‍ പങ്കെടുത്തു. വെള്ളിയാഴ്ച്ച രാവിലെ 10ന് പ്രദേശത്ത് സൗജന്യ മെഡിക്കല്‍ ക്യാംപും ബോധവല്‍ക്കരണ സെമിനാറുമുണ്ടാകുമെന്ന് ഹെല്‍ത്ത് ഇന്‍സ് പെക്ടര്‍ അജയ് കുമാര്‍ അറിയിച്ചു.