കണ്ണൂര്‍: സേനയിലെ അമിത രാഷ്ട്രീയവത്കരണം കാരണം ജില്ലയിലെ സംഘര്‍ഷ മേഖലകളില്‍ പൊലിസ് നടത്തുന്ന റെയ്ഡു വിവരം ചോരുന്നു. ഭരണം മാറുന്നതിനനുസരിച്ച് നിറംമാറുന്ന പൊലിസുകാരാണ് സേനയില്‍ കൂടുതല്‍. ഭരണകക്ഷികളെ തൃപ്തിപ്പെടുത്താനാണ് ഇവര്‍ അതീവ രഹസ്യമായി വിവരങ്ങള്‍ ചോര്‍ത്തുന്നത്. കണ്ണൂരില്‍ അടുത്തകാലത്ത് രാഷ്ട്രീയ സംഘര്‍ഷം പുതിയ പ്രദേശങ്ങളിലേക്ക് പടര്‍ന്നിരിക്കുകയാണ്. ജില്ലയില്‍ ആയുധസംഭരണവും ബോംബ് നിര്‍മാണവും പെരുകുമ്പോഴും ഇവ തടയാന്‍ പൊലിസിനു കഴിയുന്നില്ല. ചില സ്‌റ്റേഷനുകളിലെ ക്രമസമാധാന നില അതീവ ഗുരുതരമെന്നാണ് രഹസ്യാന്വേഷണ വിഭാഗം റിപ്പോര്‍ട്ടു ചെയ്തിട്ടുള്ളത്. ഇതിന്റെ അടിസ്ഥാനത്തില്‍ അടുത്ത കാലത്ത് സംഘര്‍ഷം നടന്ന സ്‌റ്റേഷന്‍ പരിധികളില്‍ വ്യാപക പരിശോധനയും റെയ്ഡും സജീവമാക്കണമെന്നാണ് ആഭ്യന്തര വകുപ്പ് നിര്‍ദേശം നല്‍കിയിട്ടുണ്ട്.
ഓരോ ഡിവൈ.എസ്.പിയുടെ പരിധിയിലും ആഴ്ചയില്‍ പരിശോധന ശക്തമാക്കണമെന്നാണ് നിര്‍ദേശം. റെയ്ഡുകളും പരിശോധനകളും സ്‌റ്റേഷന്‍ പരിധികളില്‍ നടക്കുന്നതിന് മുന്‍പ് ബന്ധപ്പെട്ട രാഷ്ട്രീയ കേന്ദ്രങ്ങളിലെത്തുന്നതിനാല്‍ റെയ്ഡുകള്‍ പ്രഹസനമായി മാറുന്ന സാഹചര്യത്തിലാണ് ഡിവൈ.എസ്.പിമാരുടെ കീഴില്‍ റെയ്ഡ് മതിയെന്ന രീതിയിലേക്ക് പുതിയ മാറ്റം. ഓരോ സ്‌റ്റേഷന്‍ പരിധിയിലും രാത്രികാല പരിശോധനയും കാര്യക്ഷമമല്ലെന്ന വിമര്‍ശനം സേനയുടെ തലപ്പത്തുണ്ട്. ജീവനക്കാരുടെയും വാഹനങ്ങളുടെയും അഭാവവമാണ് ഇതിനു കാരണമായി പൊലിസിലെ ഒരുവിഭാഗം ചൂണ്ടിക്കാട്ടുന്നത്.
കണ്ണൂര്‍ സബ് ഡിവിഷനു കീഴിലുള്ള മൂന്നു പൊലിസ് സ്‌റ്റേഷനുകളില്‍ സി.ഐമാരില്ല. നിലവിലുണ്ടായിരുന്നവര്‍ സ്ഥലംമാറി പോയതിനെ തുടര്‍ന്നാണ് വളപട്ടണം, കണ്ണൂര്‍ ടൗണ്‍, കണ്ണൂര്‍ സിറ്റി സ്‌റ്റേഷനുകളില്‍ സി.ഐമാരില്ലാത്തത്. ഒരാഴ്ച മുന്‍പാണ് ഇവരെ വിവിധ സര്‍ക്കിള്‍ പരിധികളിലേക്ക് സ്ഥലം മാറ്റിയത്.