ബേക്കല്‍: പള്ളിക്കര മഠത്തിലെ മൂകാംബിക ജ്വല്ലറിയുടെ ചുമര്‍ തുരന്ന് കവര്‍ച്ചാ ശ്രമം. ഇന്നലെ പുലര്‍ച്ചെ ഒന്നോടെയാണു സംഭവം. മൂന്നു ബൈക്കുകളിലായെത്തിയ ആറംഗ സംഘമാണ് മോഷണ ശ്രമത്തിനു പിന്നിലെന്നാണ് പൊലിസിന്റെ പ്രാഥമിക നിഗമനം. രാത്രിയില്‍ ബൈക്കില്‍ പട്രോളിങ് നടത്തുകയായിരുന്ന പൊലിസുകാരാണ് ജ്വല്ലറിയുടെ പിറകുവശത്ത് രണ്ടു പേര്‍ പതുങ്ങി നില്‍ക്കുന്നത് കണ്ടത്. പൊലിസ് സംഘത്തെ കണ്ട ഇവര്‍ മൂന്നു ബൈക്കുകളിലായി രക്ഷപ്പെടുകയായിരുന്നു. ഇന്നലെ രാവിലെയോടെയാണ് ജ്വല്ലറിയുടെ പിറകു വശത്ത് കമ്പിപ്പാര ഉപേക്ഷിച്ച നിലയിലും ചുമര്‍ ഡ്രില്ലിംഗ് മെഷീന്‍ ഉപയോഗിച്ച് തുരക്കാന്‍ ശ്രമിച്ച നിലയിലും കണ്ടെത്തിയത്.
ഇതോടെ മോഷ്ടാക്കളാണ് കഴിഞ്ഞ ദിവസം പൊലിസിനെ കണ്ട് ഓടിരക്ഷപ്പെട്ടതെന്ന് പൊലിസിനു ബോധ്യമായി.
കവര്‍ച്ചാശ്രമം നടന്ന ജ്വല്ലറിക്ക് മുന്നില്‍ സ്ഥാപിച്ച സി.സി.ടി.വി കാമറ പൊലിസ് പരിശോധിച്ചു. ആറംഗസംഘത്തിന്റെ ദൃശ്യം കാമറയില്‍ പതിഞ്ഞതായി കണ്ടെത്തി. രാത്രി ബൈക്കുകളില്‍ കടന്നുകളഞ്ഞ സംഘം തന്നെയാണിതെന്ന് പൊലിസ് സ്ഥിരീകരിച്ചു.