മലപ്പുറം: എടവണ്ണ ഒതായി പള്ളിപ്പറമ്പന്‍ മനാഫിനെ പട്ടാപ്പകല്‍ കുത്തിക്കൊലപ്പെടുത്തിയ കേസിലെ പ്രതികളെ സംരക്ഷിക്കുന്ന പി.വി അന്‍വര്‍ എം.എല്‍.എയ്‌ക്കെതിരേ ക്രിമിനല്‍ കുറ്റത്തിനു കേസെടുക്കണമെന്നു മനാഫിന്റെ കുടുംബാംഗങ്ങള്‍. എം.എല്‍.എയുടെ സഹോദരിപുത്രന്‍മാരും കേസിലെ ഒന്നും മൂന്നും പ്രതികളുമായ എടവണ്ണ മുണ്ടേങ്ങര മാലങ്ങാടന്‍ ശഫീഖ് (49), ഷെരീഫ് (51) എന്നിവര്‍ ഗള്‍ഫില്‍ ഒളിവില്‍ കഴിയുകയാണ്. ഇവര്‍ പലതവണ നാട്ടില്‍ വന്നുപോയിട്ടും അറസ്റ്റ് ചെയ്യാന്‍ പൊലിസ് തയാറായിട്ടില്ലെന്നും മനാഫിന്റെ കുടുംബം ആരോപിച്ചു.
1995 ഏപ്രില്‍ 13നാണ് ഒതായി അങ്ങാടിയില്‍ വച്ചു മനാഫ് കൊല്ലപ്പെട്ടത്. 23 വര്‍ഷം പിന്നിട്ടിട്ടും പ്രതികളെ പിടികൂടാത്തതിനെ തുടര്‍ന്ന് ലുക്ഔട്ട് നോട്ടിസ് പുറപ്പെടുവിക്കണമെന്നാവശ്യപ്പെട്ടു മനാഫിന്റെ സഹോദരന്‍ അബ്ദുറസാഖ് മഞ്ചേരി ഒന്നാം ക്ലാസ് ജുഡിഷ്യല്‍ മജിസ്‌ട്രേറ്റ് കോടതിയില്‍ ഹരജി നല്‍കിയിരുന്നു. ഇതിന്റെ അടിസ്ഥാനത്തില്‍ കഴിഞ്ഞ ജൂലൈ 25നു കോടതി ലുക്ഔട്ട് നോട്ടിസ് പുറപ്പെടുവിക്കാന്‍ ഉത്തരവിടുകയും ചെയ്തു.
ഇതിനു ശേഷം എളമരം ചെറുവായൂര്‍ പയ്യനാട്ടുതൊടിക എറക്കോടന്‍ ജാബിര്‍ എന്ന കബീര്‍ (45), നിലമ്പൂര്‍ ജനതപ്പടി കോട്ടപ്പുറം മുനീബ് (45) എന്നിവര്‍ കഴിഞ്ഞ മാസം കോടതിയില്‍ കീഴടങ്ങി. 26 പ്രതികളാണ് കേസില്‍ ഉള്‍പ്പെട്ടിരുന്നത്. ഇതില്‍ 21 പേരെ കോടതി വെറുതെവിടുകയും ഒരാള്‍ വിചാരണാ സമയത്തു മരണപ്പെടുകയും ചെയ്തിരുന്നു.
കോടതി ഉത്തരവുണ്ടായിട്ടും പ്രതികള്‍ക്കെതിരേ ലുക്ഔട്ട് നോട്ടിസിറക്കാന്‍ പോലും തയാറായിട്ടില്ലെന്നാരോപിച്ച കുടുംബാംഗങ്ങള്‍, പ്രതികളെ പിടികൂടാന്‍ മുന്‍ ഡി.ജി.പി സെന്‍കുമാറും ഡി.ജി.പി ലോക്‌നാഥ് ബെഹ്‌റയും നടത്തിയ സ്‌പെഷല്‍ ഡ്രൈവില്‍ പ്രതികളെ ഉള്‍പ്പെടുത്താത്തതു സംബന്ധിച്ച് സമഗ്ര അന്വേഷണം വേണമെന്നും ആവശ്യപ്പെട്ടു.
വാര്‍ത്താസമ്മേളനത്തില്‍ മനാഫിന്റെ സഹോദരങ്ങളായ പി.പി അബ്ദുറസാഖ്, പി.പി മന്‍സൂര്‍, സഹോദരി പി.പി ഫാത്വിമ, പിതൃസഹോദരന്‍ പി.പി അബൂബക്കര്‍ എന്നിവര്‍ സംബന്ധിച്ചു.