മാനന്തവാടി: പുതിയ അധ്യയന വര്‍ഷം ആരംഭിക്കാന്‍ ദിവസങ്ങള്‍ മാത്രം ശേഷിക്കെ തൊഴിലുറപ്പ് തൊഴിലാളികള്‍ ആശങ്കയില്‍. ആറുമാസമായി കൂലി ലഭിക്കാത്തതാണ് തൊഴിലാളികളെ ആശങ്കയിലാക്കുന്നത്.
അധ്യയന വര്‍ഷാരംഭത്തില്‍ കുട്ടികളുടെ വിദ്യാഭ്യാസ ആവശ്യങ്ങള്‍ക്കായി പണം ആവശ്യമാണെന്നിരിക്കെയാണ് തൊഴിലുറപ്പ് തൊഴിലാളികളുടെ വേതനം കേന്ദ്ര സര്‍ക്കാര്‍ കുടിശ്ശികയാക്കിയിരിക്കുന്നത്. 2016 നവംബര്‍ മുതലുള്ള ആറു മാസത്തെ കൂലിയാണ് ലഭിക്കാനുള്ളത്. 15.87 കോടി രൂപയാണ് ജില്ലയില്‍ കൂലി കുടിശ്ശിക ഉള്ളത്. അറുപത്തിയ്യായിരത്തോളം തൊഴിലാളികള്‍ക്ക് ലഭിക്കേണ്ട തുകയാണിത്. ഇതില്‍ നിര്‍ധനരും ആദിവാസി തൊഴിലാളികളും നിരവധിയാണ്. മുന്‍ വര്‍ഷങ്ങളില്‍ ഈ കൂലി ഉപയോഗിച്ചാണ് കുട്ടികള്‍ക്ക് യൂനിഫോം, ബുക്കുകള്‍, കുട, ചെരുപ്പ്, ബാഗ് എന്നിവയെല്ലാം വാങ്ങിച്ച് നല്‍കിയിരുന്നത്.
വാഴക്കുല, കുരുമുളക് തുടങ്ങിയ കാര്‍ഷിക വിളകളുടെ വിലത്തകര്‍ച്ചയും ഇത്തരം കുടുംബങ്ങളുടെ ദുരിതം ഇരട്ടിയാക്കിയിരിക്കുകയാണ്. സംസ്ഥാന സര്‍ക്കാര്‍ വിഹിതം അനുവദിച്ചിട്ടുണ്ടെങ്കിലും കേന്ദ്ര വിഹിതം ലഭിക്കാത്തതിനാല്‍ തുക വിതരണം ചെയ്യാനാകാത്ത സ്ഥിതിയാണ്. കൂലി വിതരണം ചെയ്യാനാകാത്തത് പഞ്ചായത്ത് ഭരണ സമിതികളെയും ജീവനക്കാരെയുമാണ് ഏറ്റവും അധികം പ്രതിസന്ധിയിലാക്കിയിരിക്കുന്നത്. സംസ്ഥാന സര്‍ക്കാര്‍ അടിയന്തരമായി ഇടപെട്ട് കൂലി വിതരണത്തിന് നടപടി സ്വീകരിക്കണമെന്ന ആവശ്യം ശക്തമാണ്.