ബീഫ് നിരോധനം; യൂത്ത്ലീഗ് ഹെല്ത്ത് ഓഫിസ് ഉപരോധിച്ചു
കോഴിക്കോട്: ഉച്ചക്ക് രണ്ടിനു ശേഷം ബീഫ് വില്ക്കരുതെന്ന് കാട്ടി കോര്പറേഷന് ആരോഗ്യ വകുപ്പ് നോട്ടിസ് വിതരണം ചെയ്തതില് പ്രതിഷേധിച്ച് ഇന്നലെ രാവിലെ സൗത്ത് മണ്ഡലം യൂത്ത്ലീഗ് ഇടിയങ്ങര ഹെല്ത്ത് ഓഫിസ് ഉപരോധിച്ചു.കഴിഞ്ഞയാഴ്ചയാണ് ഇടിയങ്ങരയിലെ ചില ബീഫ് കടകളില് ഹെല്ത്ത് ഉദ്യോഗസ്ഥര് നോട്ടിസ് നല്കിയത്.
കോഴിക്കോട് കോര്പറേഷനില് ആര്.എസ്.എസ് അജന്ഡ നടപ്പിലാക്കാനാണ് മേയര് ശ്രമിക്കുന്നതെന്നും ഇറച്ചിക്കടകള്ക്ക് നേരെയുള്ള പ്രതിഷേധം പ്രത്യേക വിഭാഗത്തെ മാത്രം ലക്ഷ്യംവച്ചാണെന്നും യൂത്ത്ലീഗ് ആരോപിച്ചു. ഫ്രീസ് ചെയ്യാത്ത മാംസം എട്ട് മണിക്കൂറിന് ശേഷം വില്പ്പന നടത്താന് പാടില്ലെന്ന സുപ്രിംകോടതി വിധിയുടെ അടിസ്ഥാനത്തില് കോര്പറേഷന് കൗണ്സില് തീരുമാന പ്രകാരമാണ് നോട്ടിസ് നല്കിയതെന്ന് കോര്പറേഷന് ഹെല്ത്ത് ഓഫിസര് ഗോപകുമാര് പറഞ്ഞു. കൂടാതെ കോര്പറേഷന് പരിധിയില് ആകെ 170 ഓളം ഇറച്ചിക്കടകളാണുള്ളത്. അതില് നൂറോളം കടകളും ലൈസന്സ് ഇല്ലാതെയാണ് പ്രവര്ത്തിച്ച് വരുന്നത്. പലകടകള്ക്കും മുന്നറിയിപ്പ് നല്കുകയും ചെയ്തിട്ടുണ്ട്. എല്ലായിടത്തും പുറത്ത് നിന്ന് കാണുന്ന രീതിയില് ഇറച്ചി പ്രദര്ശിപ്പിച്ച് നിയമ വിരുദ്ധമായാണ് കച്ചവടം നടത്തുന്നത്. ഇത് അനുവദിക്കാവുന്നതല്ലെന്നും അദ്ദേഹം പറഞ്ഞു. കോര്പറേഷന് പരിധിയിലെ മുഴുവന് ബീഫ്-മട്ടന് മാംസക്കച്ചവടക്കാരെ പങ്കെടുപ്പിച്ച് നാളെ ഉച്ചക്ക് രണ്ടിന് കോര്പറേഷന് ഹെല്ത്ത് ഓഫിസറുടെ നേതൃത്വത്തില് യോഗം വിളിച്ച് ചേര്ത്തിട്ടുണ്ടെന്നും അദ്ദേഹം അറിയിച്ചു. മണ്ഡലം നേതാക്കളായ സിജിത്ത്ഖാന്, യു. സജീര്, മന്സൂര് മാങ്കാവ്, ഹംസക്കോയ, റാഫി മുഖ്ദാര്, ഷംസുദ്ദീന്, നുഅ്മാന്, മൊയ്തീന് ബാബു, ഒ. മമ്മദു, ഷെമീര്, ബഷീര്, മഅ്ദനി, സലാം, മനാഫ്, മിര്ഷാദ്, സൈനുദ്ദീന്, സിറാജ്, ജൈസല് ബാബ, മായിന് ഷെരീഫ്, റാഫി എന്നിവര് നേതൃത്വം നല്കി.
Comments (0)
Disclaimer: "The website reserves the right to moderate, edit, or remove any comments that violate the guidelines or terms of service."