കൊല്ലം: അവള്‍ അറിഞ്ഞിരുന്നില്ല, ജീവിതത്തിലെ മറക്കാനാവാത്ത ആനന്ദ നിമിഷങ്ങള്‍ വന്നണയുമ്പോള്‍ ചാരത്ത് നിന്നും മാറിനിന്ന പിതാവ് എന്നെന്നേക്കുമായി യാത്രപോയി കഴിഞ്ഞിരുന്നുവെന്ന്. ഒരു പിന്‍വിളിക്കും മടക്കിക്കൊണ്ടുവരാനും ആകുമായിരുന്നില്ല അച്ഛനെയെന്നും.
ചാത്തന്നൂരില്‍ മകളുടെ വിവാഹദിവസം രാവിലെയാണ് അച്ഛനെ തൂങ്ങിമരിച്ചനിലയില്‍ കണ്ടെത്തിയത്. സാമ്പത്തികബാധ്യതയാണ് കാരണമെന്ന് സംശയിക്കുന്നതായി പൊലിസ് പറയുന്നു. അതേസമയം മരണവിവരം അറിയിക്കാതെ വിവാഹവും നടത്തി. ചിറക്കര ഉളിയനാട് പ്രസാദ് ഭവനില്‍ ബി.ശിവപ്രസാദിനെയാ(44)ണ് ഇന്നലെ രാവിലെ ഏഴോടെ ചിറക്കര ഗ്രാമപഞ്ചായത്ത് ഓഫിസിനു സമീപത്തെ കുടുംബവീട്ടില്‍ മരിച്ചനിലയില്‍ കണ്ടത്.

മകള്‍ നീതുവിന്റെ വിവാഹം ഇന്നലെ രാവിലെ 11ന് വിളപ്പുറം ആനന്ദവിലാസം ഭഗവതീക്ഷേത്ര ഓഡിറ്റോറിയത്തില്‍ നടത്താന്‍ നിശ്ചയിച്ചിരുന്നു. രാവിലെ ആറിന് വീട്ടില്‍നിന്ന് ബൈക്കുമായി പോയ ശിവപ്രസാദിനെ ഫോണില്‍ ബന്ധപ്പെടാന്‍ ശ്രമിച്ചിട്ട് കിട്ടിയില്ല. അന്വേഷിച്ചിറങ്ങിയ സുഹൃത്തുക്കള്‍ കുടുംബവീടിനുമുന്നില്‍ ബൈക്ക് ഇരിക്കുന്നതു കണ്ടു. വീട്ടില്‍ കയറി നോക്കിയപ്പോഴാണ് തൂങ്ങിമരിച്ചനിലയില്‍ കണ്ടത്. പാരിപ്പള്ളി പൊലിസെത്തി മൃതദേഹം ജില്ലാ ആശുപത്രിയിലേക്ക് മാറ്റി. ഭാര്യ: എസ്.ജലജ. മക്കള്‍: നിധിന്‍, നീതു, പ്രീജ. മരുമകന്‍: ആര്‍.എസ്.ബിജു.