അരീക്കോട്: ക്ലാസ് മുറികളുടെ കുറവു മൂലം തെഞ്ചേരി എല്‍.പി സ്‌കൂള്‍ പ്രയാസം നേരിടുന്നു. ഊര്‍ങ്ങാട്ടീരി ഗ്രാമ പഞ്ചായത്തില്‍ 1956ല്‍ തുടക്കം കുറിച്ച തെഞ്ചേരി സര്‍ക്കാര്‍ എല്‍.പി സ്‌കൂളില്‍ പ്രൈമറി വിഭാഗത്തിനു പുറമെ പ്രീ പ്രൈമറിയും പ്രവര്‍ത്തിക്കുന്നുണ്ട്. കേവലം എട്ടു ക്ലാസ് മുറികള്‍ മാത്രമുള്ള ഇവിടെ പ്രൈമറി തലത്തില്‍ 235 വിദ്യാര്‍ഥികളും പ്രീപ്രൈമറി വിഭാഗത്തില്‍ 152 വിദ്യാര്‍ഥികളും പഠനം നടത്തുന്നുണ്ട്.
പ്രിപ്രൈമറി വിഭാഗത്തിലെ വിദ്യാര്‍ഥികള്‍ ഇപ്പോള്‍ ആശ്രയമായിട്ടുള്ളതു പ്രദേശത്തെ ബയാനുല്‍ ഉലൂം മദ്‌റസ കെട്ടിടമാണ്. 2009ല്‍ എ വിജയ രാഘവന്‍ എം.പിയുടെ പ്രാദേശിക വികസന ഫണ്ട് ഉപയോഗിച്ച് നിര്‍മാണം പൂര്‍ത്തീകരിച്ച കെട്ടിടത്തിനു മുകളില്‍ ഷെഡ് നിര്‍മിച്ച് താല്‍ക്കാലികമായെങ്കിലും പരിഹാരം കാണണമെന്നാണു രക്ഷിതാക്കളുടെ ആവശ്യം. ഇതുസംബന്ധിച്ചുള്ള നിവേദനം സമര്‍പ്പിച്ചിട്ടുണ്ടെന്ന് പ്രധാനാധ്യാപിക ജോളി ജോസഫ് സുപ്രഭാതത്തോട് പറഞ്ഞു.