തിരുവനന്തപുരം: മന്ത്രവാദ - ആഭിചാര പ്രവര്‍ത്തനങ്ങള്‍ നിരോധിക്കാന്‍ നിയമനിര്‍മാണം ഉടന്‍. കര്‍ശന ശിക്ഷ ഉള്‍പ്പെടുത്തി നിയമനിര്‍മാണത്തിന്റെ കരട് തയാറാക്കാന്‍ മുന്‍ മുഖ്യമന്ത്രി വി.എസ് അച്യുതാനന്ദന്‍ ചെയര്‍മാനായുള്ള ഭരണ പരിഷ്‌കാര കമ്മിഷനെ സര്‍ക്കാര്‍ ചുമതലപ്പെടുത്തി. ഇതുസംബന്ധിച്ച് കമ്മിഷന്റെ ശുപാര്‍ശ ലഭിച്ചാല്‍ നിയമ വകുപ്പുമായി ആലോചിച്ച് ഓര്‍ഡിനന്‍സ് ഇറക്കാനാണ് സര്‍ക്കാര്‍ നീക്കം.
അന്ധവിശ്വാസങ്ങളും അനാചാരങ്ങളും മുഖാന്തിരം സംസ്ഥാനത്ത് രണ്ടു കൊലപാതകങ്ങളും 19 തട്ടിപ്പ് കേസുകളുമാണ് രജിസ്റ്റര്‍ ചെയ്തിരിക്കുന്നത്. ഏറ്റവും കൂടുതല്‍ കോഴിക്കോട് റൂറലിലാണ്. ആറു കേസുകളാണ് രജിസ്റ്റര്‍ ചെയ്തത്. ഇതില്‍ മൂന്നു പ്രതികളെ അറസ്റ്റ് ചെയ്തു. കൊല്ലം റൂറലില്‍ നാലു കേസുകളിലായി പത്തു പ്രതികളാണുള്ളത്. ഇതില്‍ അഞ്ചുപേരെ അറസ്റ്റ് ചെയ്തു. പത്തനംതിട്ടയില്‍ ഒരു കേസില്‍ എട്ടു പ്രതികളാണുള്ളത്. ഇതില്‍ ആറുപേരെ അറസ്റ്റ് ചെയ്തു. ആലപ്പുഴയില്‍ നാലു കേസുകളിലായി അഞ്ചു പേരെയും മലപ്പുറത്ത് മൂന്നു കേസുകളിലായി മൂന്നു പേരെയും പ്രതികളാക്കി. കോഴിക്കോട് സിറ്റിയിലാകട്ടെ ഒരു കേസാണുള്ളത്. മൂന്നു പ്രതികളില്‍ ഒരാളെ അറസ്റ്റ് ചെയ്തു.