കണ്ണൂര്‍: മാനേജ്‌മെന്റിന്റെയും പ്രവേശന മേല്‍നോട്ട കമ്മിറ്റിയുടെയും ധിക്കാരപരമായ നടപടിക്കെതിരേ ഒന്നാംവര്‍ഷ എം.ബി.ബി.എസ് വിദ്യാര്‍ഥികളും രക്ഷിതാക്കളും ഇന്ന് അഞ്ചരക്കണ്ടിയിലെ കണ്ണൂര്‍ മെഡിക്കല്‍കോളജിനു മുന്നില്‍ ധര്‍ണ നടത്തും. പ്രവേശന മേല്‍നോട്ട കമ്മിറ്റിയുടെ ഏകപക്ഷീയമായ തീരുമാനം തിരുത്തുക, പഠിക്കാനുള്ള മൗലികാവകാശം സംരക്ഷിക്കുക, പ്രവേശന മേല്‍നോട്ട കമ്മിറ്റി പരിശോധന നടത്താതെ റദ്ദാക്കിയ കുട്ടികളുടെ പ്രവേശനം പുനഃസ്ഥാപിക്കുക, ഹൈക്കോടതി എ.എസ്.സിക്കു നല്‍കിയ നിര്‍ദേശം നടപ്പാക്കുക തുടങ്ങിയ ആവശ്യങ്ങള്‍ ഉന്നയിച്ചാണ് സമരം. വാര്‍ത്താസമ്മേളനത്തില്‍ രക്ഷിതാക്കളായ കെ.വി ജോര്‍ജ്, ഹംസക്കോയ കോനാരി, സി.പി മാനു, വിദ്യാര്‍ഥികളായ നിഹാല, സുല്‍ത്താന സുമയ്യ സംബന്ധിച്ചു.