ദുബൈ: ഏഷ്യാ കപ്പ് ക്രിക്കറ്റിലെ രണ്ടാം മത്സരത്തില്‍ ഹോങ്കോങിനെ പരാജയപ്പെടുത്തി പാകിസ്താന്‍ വിലപ്പെട്ട രണ്ട് പോയിന്റ് സ്വന്തമാക്കി. ടോസ് നേടി ബാറ്റിങ് തിരഞ്ഞെടുത്ത ഹോങ്കോങിനെ 37.1 ഓവറില്‍ 116 റണ്‍സിന് ഓള്‍ഔട്ടാക്കിയ പാകിസ്താന്‍ 23.4 ഓവറില്‍ രണ്ട് വിക്കറ്റ് നഷ്ടത്തില്‍ ലക്ഷ്യത്തിലെത്തി. അര്‍ധ സെഞ്ച്വറിയുമായി പുറത്താവാതെ നിന്ന ഇമാമുല്‍ ഹഖിന്റെ ബാറ്റിങ്ങാണ് പാകിസ്താനെ അനായാസ ജയത്തിലെത്തിച്ചത്. 69 പന്തില്‍ മൂന്ന് ഫോറും ഒരു സിക്‌സറുമടക്കമാണ് ഇമാമുല്‍ ഹഖ് 50 റണ്‍സെടുത്തത്. ബാബര്‍ അസമും (33), ഫഖര്‍ സമാനും (24) ഇമാമുല്‍ ഹഖിന് മികച്ച പിന്തുണ നല്‍കി.
33 റണ്‍സെടുത്ത ബാബര്‍ അസം ഏകദിനത്തില്‍ ഏറ്റവും വേഗത്തില്‍ 2000 റണ്‍സ് തികച്ചവരുടെ ലിസ്റ്റില്‍ ഉള്‍പ്പെട്ടു. 45 ഇന്നിങ്‌സുകളില്‍ നിന്നാണ് ബാബര്‍ 2000 റണ്‍സെടുത്തത്. 40 ഇന്നിങ്‌സുകളില്‍ നിന്ന് 2000 റണ്‍സെടുത്ത ഹാഷിം അംലയാണ് ഒന്നാംസ്ഥാനത്ത്.
ടോസ് നഷ്ടപ്പെട്ട് ബൗളിങിനിറങ്ങിയ പാകിസ്താന്‍ ഹോങ്കോങിനെ 37.1 ഓവറില്‍ 116 റണ്‍സിന് എറിഞ്ഞൊതുക്കുകയായിരുന്നു. സ്‌കോര്‍ 17 ല്‍ നില്‍ക്കെയാണ് ഹോങ്കോങിന്റെ ആദ്യ വിക്കറ്റ് നഷ്ടപ്പെടുന്നത്. 13 റണ്‍സെടുത്ത ഓപ്പണര്‍ നിസാഖത്ത് ഖാനെ ഷദാബ് ഖാന്‍ റണ്‍ഔട്ടാക്കുകയായിരുന്നു. പിന്നീട് തുടരെ തുടരെ വിക്കറ്റ് നഷ്ടപ്പെട്ട ഹോങ്കോങിനെ കിന്‍ജിത് ഷാ - ഐസാസ് ഖാന്‍ സഖ്യമാണ് സ്‌കോര്‍ 100 കടത്താന്‍ സഹായിച്ചത്. കിന്‍ജിത് (26) റണ്‍സും ഐസസ് ഖാന്‍ (27) റണ്‍സുമെടുത്ത് പുറത്തായി.
ക്യാപ്റ്റന്‍ അന്‍ഷുമന്‍ റാത്ത് (19)ആണ് ഹോങ്കോങ് നിരയില്‍ രണ്ടക്കം കടന്ന മറ്റൊരു താരം. പാകിസ്താന് വേണ്ടി ഉസ്മാന്‍ ഖാന്‍ 7.3 ഓവറില്‍ 19 റണ്‍സ് മാത്രം വഴങ്ങി മൂന്ന് വിക്കറ്റ് നേടി. ഹസന്‍ അലിയും ഷദാബ് ഖാനും രണ്ട് വിക്കറ്റുകള്‍ വീതവും സ്വന്തമാക്കി. ശേഷിക്കുന്ന ഒരു വിക്കറ്റ് ഫഹീം അശ്‌റഫും നേടി.