തിരുവനന്തപുരം: തദ്ദേശ തെരഞ്ഞെടുപ്പില്‍ ഓരോ ജില്ലയിലെയും സീറ്റ് വിഭജനം സംബന്ധിച്ച് തീരുമാനമെടുക്കുന്നതിനും ഘടകക്ഷികള്‍ക്കിടയിലെ ആശയക്കുഴപ്പം പരിഹരിക്കുന്നതിനും പ്രചാരണ പരിപാടികള്‍ സജീവമാക്കുന്നതിനുമുള്ള യു.ഡി.എഫ് ജില്ലാ നേതൃയോഗങ്ങള്‍ക്ക് തുടക്കമായി.
യു.ഡി.എഫിന്റെ സംസ്ഥാന നേതാക്കള്‍ തന്നെ ഓരോ ജില്ലയിലും നേരിട്ട് പങ്കെടുക്കുന്നുണ്ട്. നവംബര്‍ നാലു മുതല്‍ പത്തുവരെയാണ് ജില്ലാ നേതൃയോഗങ്ങള്‍ നിശ്ചയിച്ചിരിക്കുന്നത്.
ഇന്നലെ കാസര്‍കോട്, കണ്ണൂര്‍ ജില്ലകളിലെ യോഗങ്ങള്‍ കഴിഞ്ഞു. ഇന്ന് വയനാട്, കോഴിക്കോട് ജില്ലകളിലും നാളെ മലപ്പുറം, പാലക്കാട് ജില്ലകളിലും ഏഴിന് തൃശൂര്‍, എറണാകുളം ജില്ലകളിലും എട്ടിന് ഇടുക്കി, കോട്ടയം ജില്ലകളിലും ഒന്‍പതിന് പത്തനംതിട്ട, ആലപ്പുഴ ജില്ലകളിലും പത്തിന് കൊല്ലം, തിരുവനന്തപുരം ജില്ലകളിലും യോഗങ്ങള്‍ നടക്കും.