കരുവാരകുണ്ട്: സമൂഹ വിവാഹമൊരുക്കി എന്‍ജിനീയറിങ് കോളജ് വിദ്യാര്‍ഥികള്‍ മാതൃകയാകുന്നു. പെരിന്തല്‍മണ്ണ എം.ഇ.എ എന്‍ജിനീയറിങ് കോളജ് വിദ്യാര്‍ഥികളാണ് മെഹര്‍17 എന്ന പേരില്‍ സമൂഹ വിവാഹമൊരുക്കുന്നത്.
ഇന്ന് പതിനൊന്നിന് നടക്കുന്ന പരിപാടിയില്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ കാര്‍മികത്വം വഹിക്കുന്ന ചടങ്ങില്‍ മൂന്ന് അനാഥ, അഗതി യുവതികള്‍ക്കാണ് സമൂഹ വിവാഹമൊരുക്കുന്നത്. കോളജിന്റെ അവസാന വര്‍ഷ വിദ്യാര്‍ഥികളൊരുക്കുന്ന ചടങ്ങില്‍ മുഴുവന്‍ ഭാരവാഹികളും ജീവനക്കാരും പങ്കെടുക്കും.
 വിവാഹത്തിനായി തെരഞ്ഞെടുത്ത മൂന്ന് മണവാട്ടികള്‍ക്ക് എട്ട് പവന്‍ സ്വര്‍ണവും കല്ല്യാണ വസ്ത്രവും ഒരുക്കിയിട്ടുണ്ട്. 1200 പേര്‍ക്കാണ് സദ്യയൊരുക്കിയിരിക്കുന്നത്.
ജീവനക്കാരുടെ വേതന വിഹിതവും കല്ല്യാണത്തിന് സഹായമായി.