വാഷിങ്ടണ്‍: അമേരിക്കയില്‍ തെരഞ്ഞെടുപ്പ് ഫലങ്ങള്‍ വന്നുകൊണ്ടിരിക്കെ, തന്നെ പരിഹസിച്ച ഡൊണാള്‍ഡ് ട്രംപിന് അതേ വാക്കുകളില്‍ മറുപടനല്‍കി. സ്വീഡിഷ് പരിസ്ഥിതി പ്രവര്‍ത്തകയും ആക്ടിവിസ്റ്റുമായ ഗ്രേറ്റ തന്‍ബെര്‍ഗ്. ട്രംപ് ഗ്രേറ്റക്കെതിരെ പറഞ്ഞ വാക്കുകളെ കടമെടുത്തുകൊണ്ടായിരുന്നു ഗ്രേറ്റയുടെ മറുപടി.

'പരിഹാസ്യം, ട്രംപ് നിങ്ങള്‍ ഉറപ്പായും നിങ്ങളുടെ ദേഷ്യത്തെ നിയന്ത്രിക്കാന്‍ പഠിക്കണം. എന്നിട്ട് അടുത്ത ഒരു സുഹൃത്തിന്റെ കൂടെ പോയി നല്ല സിനിമ കാണൂ! ചില്‍ ഡൊണാള്‍ഡ് ചില്‍,' ഗ്രേറ്റ ട്വീറ്റ് ചെയ്തു.

ഒരു വര്‍ഷം മുമ്പായിരുന്നു ഗ്രേറ്റയെ പരിഹസിച്ചുള്ള ട്രംപിന്റെ ട്വീറ്റ്്. ടൈം മാഗസിന്‍ പേഴ്‌സണ്‍ ഓഫ് ദി ഇയര്‍ ആയി ഗ്രേറ്റയെ തിരഞ്ഞെടുത്തിരുന്നു. ഇതിനുള്ള പ്രതികരണമായിട്ടായിരുന്നു 17 വയസ്സുള്ള ഗ്രേറ്റയെ അമേരിക്കന്‍ പ്രസിഡന്റ് പരസ്യമായി പരിഹസിച്ചത്.

'പരിഹാസ്യം, ഗ്രേറ്റ നിങ്ങള്‍ ഉറപ്പായും നിങ്ങളുടെ ദേഷ്യത്തെ നിയന്ത്രിക്കാന്‍ പഠിക്കണം. എന്നിട്ട് അടുത്ത ഒരു സുഹൃത്തിന്റെ കൂടെ പോയി നല്ല സിനിമ കാണൂ! ചില്‍ ഗ്രേറ്റ ചില്‍! എന്നായിരുന്നു ട്രംപിന്റെ ട്വീറ്റ്.

തെരഞ്ഞെടുപ്പില്‍ അട്ടിമറി നടന്നെന്നും വോട്ടെണ്ണല്‍ നിര്‍ത്തിവെക്കണമെന്നും ട്രംപ് ട്വീറ്റ് ചെയ്തിരുന്നു. ഇതിനു പിന്നാലെയാണ് തന്നെ പരിഹസിക്കാന്‍ ഉപയോഗിച്ച അതേവാക്കുകള്‍ ഗ്രേറ്റ ട്രംപിന് തിരിച്ചു നല്‍കിയിരിക്കുന്നത്.