മുക്കം: പൊലിസുകാരന്റെ വീട്ടില്‍കയറി വധഭീഷണി മുഴക്കിയതായി പരാതി. മാവൂര്‍ സ്റ്റേഷനിലെ പൊലിസുകാരനായ അരവിന്ദന്റെ വീട്ടിലെത്തിയാണ് അക്രമികള്‍ വധഭീഷണി മുഴക്കുകയും അക്രമം അഴിച്ചുവിടുകയും ചെയ്തത്. ഞായറാഴ്ച രാത്രി 10.30നാണ് സംഭവം.
നിരവധി കേസുകളില്‍ പ്രതിയായ നായര്‍കുഴി സ്വദേശി പറമ്പാട്ടുമ്മല്‍ സുലൈമാന്റെ മകന്‍ ജാസിറും സുഹൃത്തും ചില കാര്യങ്ങള്‍ സംസാരിക്കാനുണ്ടെന്നു പറഞ്ഞ് അരവിന്ദനെ പുറത്തേക്കു വിളിക്കുകയായിരുന്നു.
എന്നാല്‍ ഇപ്പോള്‍ സംസാരിക്കാന്‍ തയാറല്ലെന്നും രാവിലെ വരാന്‍ പറയുകയും ചെയ്തതോടെ പ്രകോപിതരായ പ്രതികള്‍ അരവിന്ദനെ കൊല്ലുമെന്ന് ഭീഷണിപ്പെടുത്തുകയും പുറത്തുനിര്‍ത്തിയിട്ടിരുന്ന കാറിന്റെ ചില്ലും വീടിന്റെ ജനല്‍ചില്ലുകളും അടിച്ചു തകര്‍ക്കുകയുമായിരുന്നു. കഴിഞ്ഞ അഞ്ചിന് പറമ്പാട്ടുമ്മന്‍ സുലൈമാനെ പിടിക്കാനായി പോയ അരവിന്ദനെ പ്രതി അക്രമിച്ചു പരുക്കേല്‍പ്പിച്ചിരുന്നു.
പറമ്പാട്ടുമ്മന്‍ സുലൈമാന്‍ ചെക്ക് കേസിലും മണല്‍ കേസിലും ഉള്‍പ്പെടെ പ്രതിയാണ്. ഈ കേസില്‍ ഒളിവില്‍ പോയ സുലൈമാന്റെ വീട്ടിന്‍ ഞായറാഴ്ച പകല്‍ മാവൂര്‍ എസ്.ഐയുടെ നേതൃത്വത്തില്‍ റെയ്ഡ് നടത്തിയിരുന്നു. ഇതിലുള്ള വിരോധമാണ് സംഭവത്തിനു കാരണമെന്ന് പൊലിസ് പറഞ്ഞു.