വാഷിങ്ടണ്‍: 'ചില്‍ ഡൊണാള്‍ഡ് ചില്‍'. ദേഷ്യംതീര്‍ക്കാന്‍ താന്‍ മുന്‍പ് തൊടുത്തുവിട്ട വാക്കുകള്‍ ഇപ്പോള്‍ യു.എസ് പ്രസിഡന്റ് ഡൊണാള്‍ഡ് ട്രംപിനെ അതേ രീതിയില്‍ തിരിഞ്ഞുകൊത്തുകയാണ്. 17കാരിയായ സ്വീഡിഷ് പരിസ്ഥിതി പ്രവര്‍ത്തകയും ആക്ടിവിസ്റ്റുമായ ഗ്രേറ്റ തുന്‍ബെര്‍ഗാണ് പരാജയഭീതിയില്‍ വ്യാജ ആരോപങ്ങള്‍ ഉന്നയിക്കുന്ന ട്രംപിനെ അദ്ദേഹത്തിന്റെ വാക്കുകള്‍ തന്നെ കടമെടുത്ത് ട്രോളിയിരിക്കുന്നത്.
'പരിഹാസ്യം, ട്രംപ് നിങ്ങള്‍ ഉറപ്പായും നിങ്ങളുടെ ദേഷ്യത്തെ നിയന്ത്രിക്കാന്‍ പഠിക്കണം. എന്നിട്ട് അടുത്ത ഒരു സുഹൃത്തിന്റെ കൂടെ പോയി നല്ല സിനിമ കാണൂ! ചില്‍ ഡൊണാള്‍ഡ് ചില്‍,' ഗ്രേറ്റ ട്വീറ്റ് ചെയ്തു.
11 മാസം മുന്‍പാണ് ഗ്രേറ്റയെ അധിക്ഷേപിച്ച് ട്രംപ് സമാന ട്വീറ്റ് ചെയ്തത്. ടീനേജ് കാലാവസ്ഥാ പ്രവര്‍ത്തകയായി ടൈം മാഗസിന്‍ ഗ്രേറ്റയെ തെരഞ്ഞെടുത്തതിനെ വിമര്‍ശിച്ചായിരുന്നു ട്രംപിന്റെ ട്വീറ്റ്. അതേ ട്വീറ്റ് ട്രംപിനെക്കുറിച്ചാക്കി മാറ്റിയാണ് ഗ്രേറ്റയുടെ മധുര പ്രതികാരം.
'പരിഹാസ്യം, ഗ്രേറ്റ ഉറപ്പായും നിങ്ങളുടെ ദേഷ്യത്തെ നിയന്ത്രിക്കാന്‍ പഠിക്കണം. എന്നിട്ട് ഒരു സുഹൃത്തിനെക്കൂട്ടി ഒരു സിനിമയൊക്കെ പോയി കാണൂ. ചില്‍ ഗ്രേറ്റ ചില്‍,'എന്നായിരുന്നു ട്രംപ് ഗ്രേറ്റയെ പരിഹസിച്ച് 2019 ഡിസംബര്‍ 12ന് ട്വീറ്റ് ചെയ്തത്.
എന്നാല്‍നഇതേ വാക്കുകള്‍ കടമെടുത്ത് ട്രംപിനെതിരേയുള്ള ഗ്രേറ്റയുടെ ട്വീറ്റ് ഇതിനകം സാമൂഹിക മാധ്യമങ്ങളില്‍ നിരവധിപേര്‍ പങ്കുവച്ചു.
യു.എസ് പ്രസിഡന്റ് തെരഞ്ഞെടുപ്പില്‍ ട്രംപിനെ വിമര്‍ശിച്ച് ഗ്രേറ്റ നേരത്തെയും രംഗത്തെത്തിയിരുന്നു. ഡെമോക്രാറ്റിക് സ്ഥാനാര്‍ഥി ബൈഡന് വോട്ട് നല്‍കണമെന്നും ഗ്രേറ്റ അമേരിക്കക്കാരോട് അഭ്യര്‍ഥിച്ചിരുന്നു.