റിയാദ്: അതിവേഗം വളരുന്ന വിമാന റൂട്ടുകളില്‍ സഊദിയിലെ ജിദ്ദ-റിയാദ് സെക്റ്റര്‍ ഏറ്റവും മുന്നില്‍. ഫ്‌ളൈറ്‌സ് റൂട്‌സ് അനലൈസര്‍ റൂട്‌സ് ഓണ്‍ലൈന്‍ നടത്തിയ പഠനത്തിലാണ് ജിദ്ദ റിയാദ് സെക്റ്ററാണ് ഏറ്റവും അതിവേഗം വളരുന്ന റൂട്ടുകളെന്നു കണ്ടെത്തിയത്. മധ്യേഷ്യയില്‍ ഏറ്റവും മുന്നിലും ലോകാടിസ്ഥാനത്തില്‍ വളര്‍ച്ച ഏറ്റവും ഉയര്‍ന്ന മേഖലയുമാണ് ഇതെന്ന് റിപ്പോര്‍ട്ടില്‍ വ്യക്തമാക്കുന്നുണ്ട്. 2017 സാമ്പത്തിക വര്‍ഷത്തില്‍ 857 കിലോമീറ്റര്‍ ദൂരമുള്ള രണ്ടു നഗരികള്‍ തമ്മിലുള്ള ഈ സെക്റ്ററില്‍ 5.09 മില്യണ്‍ യാത്രികര്‍ കയറിയിറങ്ങിയതായാണ് കണക്കുകള്‍. ഇന്തോനേഷ്യയിലെ ജക്കാര്‍ത്ത-മലേഷ്യയിലെ ക്വാലാലംപൂര്‍ സെക്റ്ററാണ് രണ്ടാം സ്ഥാനത്തുള്ളത്.

സഊദി ദേശീയ വിമാന കമ്പനിയായ സഊദിയ, ഇതിനു കീഴിലെ ഫ്‌ളൈ അദീല്‍, ഫ്‌ളൈ നാസ്, നെസ്മ എയര്‍, സഊദി ഗള്‍ഫ് എയര്‍ എന്നീ അഞ്ചു വിമാന കമ്പനികളാണ് റിയാദ് ജിദ്ദ സെക്റ്ററില്‍ വിമാന സര്‍വ്വീസ് നടത്തുന്നത്. മുസ്‌ലിം ലോകത്തിന്റെ സിരാ കേന്ദ്രമായ മക്കക്ക് സമീപത്തെ ഏറ്റവും വലിയ പട്ടണമായതും കഴിഞ്ഞ വര്‍ഷം സര്‍വ്വീസ് ആരംഭിച്ച സഊദിയയുടെ ഫ്‌ളൈ അദീലിന്റെ വളരെ ചെലവ് കുറഞ്ഞ ടിക്കറ്റ് നിരക്കുമാണ് ഈ സെക്റ്റര്‍ ഇത്തരത്തില്‍ തിരക്കേറിയ സെക്റ്ററാകാന്‍ കാരണം. ഇതേ റൂട്ടില്‍ വിമാന ട്രാഫിക്കിലും വര്‍ദ്ധനവ് രേഖപ്പെടുത്തിയിട്ടുണ്ട്.