മൂവാറ്റുപുഴ: ഡെങ്കിപ്പനി പടര്‍ന്ന് പിടിച്ച് രണ്ട് പേര്‍ മരിക്കുകയും നിരവധിയാളുകള്‍ പനി ബാധിച്ച് വിവിധ ആശുപത്രികളില്‍ ചികിത്സയില്‍ കഴിയുന്ന മുളവൂര്‍ പ്രദേശത്ത് സി.പി.എം മുളവൂര്‍ ലോക്കല്‍ കമ്മിറ്റിയുടെ ആഭിമുഖ്യത്തില്‍ മൂവാറ്റുപുഴ സഹകരണ ആശുപത്രി, ജനറല്‍ ആശുപത്രി, പായിപ്ര ആരോഗ്യ കേന്ദ്രം എന്നിവയുടെ സഹകരണത്തോടെ മെഗാ മെഡിക്കല്‍ ക്യാംപും ബോധവല്‍ക്കരണ ക്ലാസ്സും സൗജന്യ മരുന്ന് വിതരണവും, രക്തപരിശോധനയും നടത്തി.
ക്യാംപിന്റെ ഉദ്ഘാടനം മൂവാറ്റുപുഴ സഹകരണ ആശുപത്രി സെക്രട്ടറി എം.എ സഹീര്‍ ഉദ്ഘാടനം ചെയ്തു. വി.എസ് മുരളി അധ്യക്ഷത വഹിച്ചു. ബ്ലോക്ക് പഞ്ചായത്ത് മെമ്പര്‍ ടി.എച്ച് ബബിത, പഞ്ചായത്ത് മെമ്പര്‍മാരായ എ.ജി മനോജ്, സീനത്ത് അസീസ്, സൈനബ കൊച്ചക്കോന്‍,സി.പി.എം ലോക്കല്‍ സെക്രട്ടറി യു.പി വര്‍ക്കി, ് എന്നിവര്‍ പ്രസംഗിച്ചു. ബോധവല്‍ക്കരണ ക്ലാസിന് ഹെല്‍ത്ത് സൂപ്പര്‍വൈസര്‍ എം.കെ ഹസൈനാര്‍ നേതൃത്വം നല്‍കി.
മെഡിക്കല്‍ ക്യാംപിന് ഡോക്ടര്‍മാരായ ഷാജഹാന്‍, തോമസ് മാത്യു, പാര്‍വ്വതി ജയപ്രകാശ്, പൂജ പുഷ്പന്‍ എന്നിവര്‍ നേതൃത്വം നല്‍കി.