മൂവാറ്റുപുഴ: പദവി ദുര്‍വിനിയോഗം ചെയ്ത് സ്വത്ത് സമ്പാദിച്ചതുമായി ബന്ധപ്പെട്ട് എറണാകുളം ജില്ലാ പഞ്ചായത്ത് വൈസ്പ്രസിഡന്റ് അബ്ദുള്‍ മുത്തലിബിനെതിരേ ത്വരിതാന്വേഷണത്തിന് മൂവാറ്റുപുഴ വിജിലന്‍സ് കോടതി ഉത്തരവിട്ടു. കോണ്‍ട്രാക്ടറായ ആലുവ നേരെവീട്ടില്‍ സുനിജോണി, ആലുവ ഇറിഗേഷന്‍ സബ് ഡിവിഷന്‍ ഓഫിസ് അസി. എക്‌സിക്യൂട്ടീവ് എന്‍ജിനീയര്‍ സുമേഷ്‌കുമാര്‍ എന്നിവര്‍ക്കെതിരേയും അന്വേഷണം നടത്താന്‍ നിര്‍ദേശമുണ്ട്.
കിഴക്കേ കടുങ്ങല്ലൂര്‍ സ്വദേശി അബ്ദുള്‍ മജീദ് നല്‍കിയ ഹരജിയെ തുടര്‍ന്നാണ് ഉത്തരവ്. ജില്ലാ പഞ്ചായത്ത് കീഴ്മാട് ഡിവിഷനില്‍നിന്ന് വിജയിച്ച അബ്ദുള്‍ മുത്തലിബിന് ബിനാമി പേരുകളില്‍ 120 കോടി രൂപയുടെ ആസ്തിയുണ്ടെന്ന് ഹരജിയില്‍ പറയുന്നു.
പുറമ്പോക്കു ഭൂമിയിലെ തോട് ഔദ്യോഗിക രേഖകളില്‍ പുഴയാക്കി റിവര്‍ പ്രൊട്ടക്ഷന്‍ ഫണ്ടില്‍ നിന്ന് 6.66 ലക്ഷം രൂപ അനുവദിപ്പിച്ചു.
പിന്നീട് ഈ തോട് നികത്തി സ്വന്തമാക്കി. വ്യാജ രേഖകള്‍ ഹാജരാക്കി പണം അനുവദിച്ചു. ഇതിനു സ്ഥാനം ദുരുപയോഗം ചെയ്തുവെന്നും 18 വസ്തുക്കള്‍ പദവി ദുര്‍വിനിയോഗം ചെയ്ത് വാങ്ങിയെന്നും ഹരജിക്കാരന്‍ ചൂണ്ടിക്കാട്ടിയിരുന്നു.
വിജിലന്‍സ് ആന്റി കറപ്ഷന്‍ സ്‌പെഷല്‍ സെല്‍ എസ്.പിയോട് അന്വേഷണം നടത്തി ജൂണ്‍ 30നകം റിപ്പോര്‍ട്ട് നല്‍കാന്‍ ആവശ്യപ്പെട്ടിട്ടുണ്ട്.